(រដ្ឋបាលខេត្តកំពង់ធំ)៖ ឯកឧត្តម សុខ លូ អភិបាលខេត្តកំពង់ធំ និងមន្ត្រីជំនាញចុះចាក់វ៉ាក់សាំងការពារជំងឺសត្វពាហនៈគោ ក្របី ចំនួន ជិត៦០០ក្បាល របស់ប្រជាពលរដ្ឋ នៅឃុំចុងដូង ស្រុកបារាយណ៍ នាព្រឹកថ្ងៃទី១៧ ខែកក្កដា ឆ្នាំ២០២០។
ថ្លែងនៅក្នុងពិធីចាក់វ៉ាក់សាំងនេះដែរ ឯកឧត្តម សុខ លូ មានប្រសាសន៍លើកឡើងថា ការចាក់វ៉ាក់សាំងការពារជំងឺសត្វសត្វពាហនៈនៅពេលនេះ គឺមិនមានការបងថ្លៃនោះទេ។ ម្យ៉ាងវិញទៀត សូមពុកម៉ែបងប្អូនត្រូវចេះថែរក្សាការពារសត្វពាហនៈ គោ ក្របី របស់យើង ព្រោះសត្វនេះ គឺជាកម្លាំងអូសទាញ ដ៏មានសារសំខាន់របស់បងប្អូនប្រជាកសិករ ក្នុងការប្រកបមុខរបរធ្វើស្រែចម្ការ ប្រសិនបើសត្វទាំងនេះ មានបញ្ហាអ្វីមួយនោះ សូមរាយការណ៍ជាបន្ទាន់ ដល់ភ្នាក់ងារពេទ្យសត្វភូមិ ចៀសវាងបង្កឱ្យមានជំងឺឆ្លងរីករាលដាលកាន់តែធ្ងន់ធ្ងរ អាចឈឺ ឬងាប់ ដែលនាំឲ្យខាត់បង់នូវចំណូលសេដ្ឋកិច្ចគ្រួសាររបស់យើង។
លើសពីនេះទៀត ឯកឧត្តម សុខ លូ បានជំរុញឲ្យ ក្រុមការងារ និងមន្ត្រីជំនាញសុខមាលភាពសត្វ ត្រូវបន្តសកម្មភាពចាក់វ៉ាក់សាំងការពារជំងឺសត្វពាហនៈនេះ នៅគ្រប់ក្រុងស្រុកទាំងអស់ ទូទាំងខេត្តកំពង់ធំ មុនរដូវទឹកជំនន់ចូលមកដល់នាពេលខាងមុខនេះ។
ជាមួយគ្នានោះដែរ ឯកឧត្តម សុខ លូ បានក្រើនរំលឹកដល់បងប្អូនប្រជាពលរដ្ឋ សូមចូលរួមទប់ស្កាត់ជំងឺឆ្លងរលាកផ្លូវដង្ហើមកូវីដ-១៩ ដោយមិនត្រូវមានការប្រមូលផ្តុំ ឬជួបជុំគ្នាច្រើននោះទេ ។ ជាពិសេសត្រូវ រក្សាអនាម័យជាប់ជានិច្ច ឧស្សាហ៍លាងដៃនឹងសាប៊ូឲ្យបានញឹកញាប់ ឬទឹកអាល់កុល ឬជែលដាក់ជាប់តាមខ្លួនជាប្រចាំ នៅពេលធ្វើដំណើរនៅគ្រប់ទីកន្លែង ត្រូវពាក់ម៉ាសការពារ ឬប្រើកន្សែងទប់មាត់នៅពេលក្អក ឬកណ្តាស់។
ឯកឧត្តមបន្ថែមទៀតថា បច្ចុប្បន្ននេះ ប្រមុខរដ្ឋាភិបាលនៃព្រះរាជាណាចក្រកម្ពុជា ដឹកនាំដោយសម្តេចអគ្គមហាសេនាបតីតេជោ ហ៊ុន សែន ស្របពេលដែលប្រទេសកម្ពុជាកំពុងតែទទួលរងនូវផលប៉ះពាល់នូវជំងឺកូវីដ-១៩ បានដាក់ចេញនូវ «កម្មវិធីផ្តល់សាច់ប្រាក់ជូនប្រជាពលរដ្ឋដែលមានជីវភាពក្រីក្រ និងងាយរងគ្រោះដោយសារផលប៉ះពាល់នៃជំងឺកូវីដ-១៩» ដើម្បីកាត់បន្ថយការលំបាកជូនបងប្អូនជាប្រជាពលរដ្ឋក្រីក្រពិតប្រាកដ។
ចុងបញ្ចប់ ឯកឧត្តម សុខ លូ បានសំណូមពរដល់ពុកម៉ែបងប្អូនទាំងអស់ ជួយណែនាំកូនៗ ជាពិសេស យុវជន ត្រូវជៀសឲ្យឆ្ងាយពីគ្រឿងញៀន សូមចូលរួមគោរពច្បាប់ចរាចរណ៍ បើកបរម៉ូតូត្រូវពាក់មួកសុវត្ថិភាព ទាំងអ្នកបើកបរ និងអ្នករួមដំណើរ បើកគោយន្តនៅពេលយប់ត្រូវមានភ្លើងបំភ្លឺ និងមានបិទចំណាំងផ្លាតគ្រប់គ្រាន់៕
