(រដ្ឋបាលខេត្តកំពង់ធំ)៖ នៅថ្ងៃទី៣០ ខែមីនា ឆ្នាំ២០២០ ឯកឧត្តម សុខ លូ អភិបាលខេត្តកំពង់ធំ និងសហការី បន្តចុះជួបប្រជាពលរដ្ឋមានការខ្វះខាត និងបងប្អូនពលករដែលទើបត្រឡប់មកពីបរទេសនៅតាមខ្នងផ្ទះ នៅស្រុកប្រាសាទ បល្ល័ង្ក និងស្រុកកំពង់ស្វាយ ដើម្បីណែនាំបន្ថែមពីជំងឺរលាកផ្លូវដង្ហើមកូវីដ-១៩ ព្រមទាំងសំណូមពរដល់បងប្អូនពលករមកពីបរទេស បន្តរស់នៅដាច់ដោយឡែករយ:ពេល ១៤ថ្ងៃ ដើម្បីសុខភាពគ្រួសារ និងសង្គមជាតិយើងទាំងមូល។
ថ្លែងក្នុងពិធីចុះជួបនោះដែរ ឯកឧត្តម សុខ លូ មានប្រសាសន៍លើកឡើងថា សូមបងប្អូនប្រជាពលរដ្ឋទាំងអស់ ថែរក្សាសុខភាព និងអនាម័យ ដោយលាងដៃនឹងសាប៊ូ ឬទឹកអាល់កុល ឲ្យបានញឹកញាប់ មុននឹងញាំចំណីអាហារ ជាពិសេសបងប្អូនពលករដែលត្រឡប់ពីបរទេស ត្រូវរស់នៅដាច់ដោយឡែករយៈពេល១៤ថ្ងៃ ដើម្បីទប់ស្កាត់ការរីករាលដាលនៃជំងឺឆ្លងកូវីដ-១៩ រាតត្បាតក្នុងមូលដ្ឋានរបស់យើង ស្របតាមសេចក្តី ជូនដំណឹងរបស់ក្រសួងសុខាភិបាល។
ជាមួយគ្នានោះដែរ ឯកឧត្តម អភិបាលខេត្ត បានអំពាវនាវដល់បងប្អូនប្រជាពលរដ្ឋទាំងអស់ កុំធ្វើការប្រមូលផ្តុំ និងជួបជុំគ្នាជាក្រុមធំ ជាពិសេសអនុវត្តន៍តាមសេចក្តីជូនដំណឹងរបស់ក្រសួងសុខាភិបាល ក្នុងរស់នៅប្រចាំថ្ងៃ និងកុំធ្វើដំណើរឆ្លងកាត់ភូមិមួយទៅភូមិក្នុងករណីមិនចាំបាច។ ឯកឧត្តមបញ្ជាក់ទៀតថា ពលករចំណាកស្រុកមកកាន់មាតុប្រទេសក្នុងខេត្តកំពង់ធំសរុបនាពេលបច្ចុប្បន្ន មានចំនួន ៣.៣៣៣នាក់។ ហើយក្នុងចំណោមប្រជាពលរដ្ឋទាំងអស់ក្នុងខេត្ត បានបញ្ជូនកំហាកទៅពិនិត្យ ស្វែងវីរុសកូវីដ១៩ មានចំនួន១៧កំហាក ជាលទ្ធផលអវិជ្ជាមានទាំងអស់៕