(រដ្ឋបាលខេត្តកំពង់ធំ): នាព្រឹកថ្ងៃទី៣០ ខែកញ្ញា ឆ្នាំ២០២២ ឯកឧត្តម ងួន រតនៈ អភិបាលខេត្តកំពង់ធំ ដឹកនាំក្រុមការងារ ចុះត្រួតពិនិត្យស្ថានភាពទឹកជំនន់នៅស្រុកប្រាសាទសំបូរ ដែលកំពុងមានការលិចខ្លាំងទាំង ៥ឃុំ នៃស្រុកប្រាសាទសំបូរ បង្ករមានផលប៉ះពាល់យ៉ាងខ្លាំងដល់ជីវភាពរស់នៅប្រចាំថ្ងៃរបស់បងប្អូនប្រជាពលរដ្ឋ ។
ជាមួយគ្នានោះដែរ ឯកឧត្តម អភិបាលខេត្តកំពង់ធំ បានជំរុញឲ្យអាជ្ញាធរមូលដ្ឋាន បន្តតាមដាននូវស្ថានភាពទឹកជំនន់ និងចាត់វិធានការជម្លៀសប្រជាពលរដ្ឋនៅតំបន់ទឹកលិចឲ្យឆាប់រហ័ស មករកទទួលមានសុវត្ថិភាព។ ម្យ៉ាងវិញទៀត លោកអភិបាលក្រុងស្រុក ត្រូវតាមដានស្ថានភាពភូមិដាច់ស្រយាល់ដែលប្រជាពលរដ្ឋបានរស់នៅដែលទទួលការគំរាមកំហែងពីទឹកជំនន់ ត្រូវពន្យល់ និងអប់រំពួកគាត់ មករកទីទួលសុវត្ថិភាព។ លើសពីនេះទៀត ត្រូវធ្វើការផ្សព្វផ្សាយអប់រំដល់បងប្អូនប្រជាពលរដ្ឋទាំងអស់ មិនត្រូវនាំគ្នាមកលេងទឹកដែលកំពុងហូរខ្លាំងនោះ ដែលអាចបង្កឲ្យមានគ្រោះ ព្រមទាំងដាក់កម្លាំងប្រចាំការ និងដាក់បម្រាមមិនឲ្យប្រជាពលរដ្ឋមកលេងទឹកជាដាច់ខាត ដែលអាចបង្កឲ្យមានគ្រោះថា្នក់ជាយថាហេតុ។
ទន្ទឹមនឹងនោះ ឯកឧត្តម ងួន រតនៈ បានអំពាវនាវដល់បងប្អូនទាំងអស់ដែលមកបោះទីតាំងលើទីទួលសុវត្ថិភាព សូមរក្សាសុខភាព រក្សាអនាម័យ ហូបចុកស្អាត ផឹកស្អាត ត្រូវទុកដាក់កាកសំណល់ឲ្យត្រឹមត្រូវជាដើម។
