(រដ្ឋបាលខេត្តកំពង់ធំ): នារសៀលថ្ងៃទី១០ ខែតុលា ឆ្នាំ២០២២ ឯកឧត្តម ងួន រតនៈ អភិបាលខេត្តកំពង់ធំ និងក្រុមការងារ បាននាំយកអំណោយរបស់សម្ដេចតេជោ ហ៊ុន សែន ចែកជូនដល់ប្រជាពលរដ្ឋចំនួន ២០០គ្រួសារ ដែលទទួលរងគ្រោះដោយសារជំនន់ទឹកភ្លៀង នៅក្រុងស្ទឹងសែន ខេត្តកំពង់ធំ ។
ឯកឧត្តម ងួន រតនៈ បានថ្លែងថា អំណោយទាំងនេះ គឺជាអំណោយរបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា សម្រាប់ចែកជូនពុកម៉ែបងប្អូនប្រជាពលរដ្ឋដែលទទួលរងគ្រោះដោយសារជំនន់ទឹកភ្លៀង ប៉ុន្តែមិនបានធ្វើការចែកជូនបងប្អូនប្រជាពលរដ្ឋគ្រប់គ្នានោះទេ គឺយើងជ្រើសរើសយកតែប្រជាពលរដ្ឋណាដែលទទួលរងនូវផលប៉ះពាល់ទឹកជំនន់ខ្លាំង និងមានជីវភាពខ្វះខាតតែប៉ុណ្ណោះ។
ជាមួយគ្នានោះដែរ ឯកឧត្តម អភិបាលខេត្តកំពង់ធំ បានពាំនាំការផ្តាំផ្ញើសាកសួរសុខទុក្ខពីសម្តេចទាំងទ្វេរជូនចំពោះពុកម៉ែបងប្អូនទាំងអស់ ដែលបានទទួលរងគ្រោះជំនន់ទឹកភ្លៀង និងកំពុងជួបការលំបាក ដោយសារទឹកលិចផ្ទះសម្បែង លិចផ្លូវ ពិបាកធ្វើដំណើរ ក៏ដូចជាការប្រមុខរបរប្រចាំថ្ងៃជាដើម។
ឯកឧត្តម ងួន រតនៈ បានជំរុញឲ្យក្រុមការងារចុះជួយសង្កាត់ សហការជាមួយចៅសង្កាត់ បន្តសកម្មភាពចុះសាកសួរសុខទុក្ខប្រជាពលរដ្ឋទឹកលិច និងជ្រើសរើសមុខសញ្ញាអ្នកដែលជួបការលំបាកខ្លាំង ទោះបីមួយគ្រួសារ ឬ ពីរគ្រួសារ ត្រូវនាំយកអំណោយចែកជូនពួកគាត់តាមខ្នងផ្ទះបន្តទៀត ដោយមិនទុកឲ្យបងប្អូនប្រជាពលរដ្ឋណាម្នាក់ ខ្វះខាតស្បៀងអាជ្ញាធរមិនដឹងនោះទេ។
ឯកឧត្តម ងួន រតនៈ បានសំណូមពរដល់ពុកម៉ែបងប្អូនទាំងអស់ ដែលមិនទាន់បានចាក់វ៉ាក់សាំង ឬក៏ចាក់វ៉ាក់សាំងមិនទាន់គ្រប់ចំនួននៃការកំណត់របស់ប្រមុខរាជរដ្ឋាភិបាល សូមទៅចូលរួមចាក់វ៉ាក់សាំងការពារជំងឺកូវីដ១៩ ទាំងអស់គ្នា ដើម្បីខ្លួនយើង និងសង្គមជាតិយើង និងកុំភ្លេចទៅចូលរួមចុះឈ្មោះបោះឆ្នោតនៅថ្ងៃទី២០ ខែតុលាខាងមុខនេះ ដើម្បីយើងមានឱកាសទៅបោះឆ្នោតជ្រើសរើសថ្នាក់ដឹកនាំប្រទេស ដែលអាចរក្សានូវសុខសន្តិភាពបន្តទៅទៀត។
សូមបញ្ជាក់ផងដែរថា ប្រជាពលរដ្ឋចំនួន ២០០គ្រួសារ ក្នុងមួយគ្រួសារទទួលបាន៖ អង្ករ មី ទឹកត្រី ទឹកស៊ីអ៊ីវ ត្រីខ ទឹកបរិសុទ្ធ និងអំបិល។
