(រដ្ឋបាលខេត្តកំពង់ធំ) ៖ ឯកឧត្តម ងួន រតនៈ អភិបាលខេត្តកំពង់ធំ ថ្លែងថា សម្តេចតេជោ ហ៊ុន សែន បានត្រៀមពូជស្រូវ និងពូជបន្លែជាច្រើនមុខ ទុកចែកជូនប្រជាពលរដ្ឋ ដែលទទួលរងផលប៉ះពាល់ដំណាំស្រូវខូចខាតទាំងស្រុង សម្រាប់បង្ករបង្កើនផលឡើងវិញ ព្រមទាំងត្រៀមថវិកាមួយចំនួនទៀត ក្នុងការស្តារហេដ្ឋារចនាសម្ព័ន្ធ បន្ទាប់ពីទឹកស្រកទៅវិញ។
ការថ្លែងយ៉ាងដូច្នេះ នៅក្នុងពិធីចែកអំណោយស្បៀងបន្ទាន់របស់សម្តេចតេជោ ជូនដល់ប្រជាពលរដ្ឋចំនួន ៤៥០គ្រួសារ កំពុងជួបការលំបាក ទទួលរងគ្រោះដោយសារជំនន់ទឹកភ្លៀង និងមានជីវភាពខ្វះខាត ស្ថិតនៅឃុំព្រៃគុយ ស្រុកកំពង់ស្វាយ ខេត្តកំពង់ធំ នាព្រឹកថ្ងៃទី១៤ ខែតុលា ឆ្នាំ២០២២។
ឯកឧត្តម អភិបាលខេត្តកំពង់ធំ បន្តទៀតថា គ្រោះទឹកជំនន់ឆ្នាំនេះ ធំជាងឆ្នាំមុន ដែលបានបង្ករឲ្យមានការខូចខាតហេដ្ឋារចនាសម្ព័ន្ធ ទាំងផ្លូវលំ និងផ្លូវកៅស៊ូ អស់ជាច្រើនគីឡូម៉ែត្រ ហើយនៅក្នុងស្រុកកំពង់ស្វាយ ក៏មានការដាច់ស្ពានចំនួនពីរកន្លែងផងដែរ ធ្វើឲ្យប្រជាពលរដ្ឋពិបាកក្នុងការធ្វើដំណើរប្រចាំថ្ងៃផងដែរ។ ក្រៅពីនេះទៀត ជំនន់ទឹកភ្លៀង បានលិចផ្ទះសម្បែង ប៉ះពាល់ទៅដល់ប្រជាពលរដ្ឋជាច្រើនគ្រួសារ ហើយគ្រួសារមួយចំនួន ត្រូវជម្លៀសចេញពីផ្ទះរកទីទួលមានសុវត្ថិភាព ធ្វើឲ្យប្រជាពលរដ្ឋពិបាកក្នុងការប្រកបមុខរបរប្រចាំថ្ងៃ។
ដោយមើលឃើញពីទុក្ខលំបាក និងដោះស្រាយបញ្ហាប្រឈមទាំងនេះ សម្តេចតេជោបានផ្តល់ស្បៀងបន្ទាន់ តាមរយៈរដ្ឋបាលខេត្ត សម្រាប់ចែកជូនបងប្អូននាពេលនេះឲ្យបានទាន់ពេលវេលា និងចំគោលដៅ ហើយអំណោយទំាំងនេះ គឺមិនបានចែកគ្រប់គ្នានោះទេ ដោយអាជ្ញាធរស្រុក ស្រង់យកតែអ្នកដែលប៉ះពាល់ខ្លាំង មានជីវភាពទន់ខ្សោយជាងគេ ក្នុងចំណោមអ្នកដែលប៉ះពាល់ទាំងអស់។
ក្នុងនាមថ្នាក់ដឹកនាំខេត្ត និងប្រជាពលរដ្ឋទូទាំងខេត្តកំពង់ធំ សូមគោរពថ្លែងអំណរគុណដល់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ដែលតែងតែយកចិត្តទុកដាក់ណាស់អំពីការលំបាករបស់បងប្អូនប្រជាពលរដ្ឋនៅគ្រប់ទីន្លែងទាំងអស់ ទុក្ខលំបាករបស់ប្រជាពលរដ្ឋ គឺជាទុក្ខលំបាករបស់ថ្នាក់ដឹកនាំ ដោយមិនទុកប្រជាពលរដ្ឋណាម្នាក់ អត់ឃ្លានដោយមិនមានអាជ្ញាធរបានដឹងនោះទេ។
ឯកឧត្តម ងួន រតនៈ ក៏បានផ្ដាំផ្ញើដល់បងប្អូនប្រជាពលរដ្ឋទាំងអស់ ត្រូវមានអនាម័យបីប្រការគឺ(ហូបស្អាត ផឹកស្អាត និងរស់នៅស្អាត)។ សូមចូលរួមទៅចាក់វ៉ាក់សាំងការពារជំងឺកូវីដ-១៩ ឲ្យបានគ្រប់ៗគ្នា នៅតាមមណ្ឌលសុខភាពក្នុងមូលដ្ឋានរបស់បងប្អូន ព្រមទាំងទៅពិនិត្យឈ្មោះក្នុងបញ្ជីឈ្មោះបោះឆ្នោត ដើម្បីយើងមានឱកាសបោះឆ្នោតជ្រើសរើសថ្នាក់ដឹកនាំប្រទេស ដែលអាចរក្សាបាននូវសុខសន្តិភាព ស្ថេរភាពនយោបាយ ប្រទេសជាតិមានការរីកចម្រើនបន្តទៅមុខទៀត។
សូមបញ្ជាក់ថា ប្រជាពលរដ្ឋចំនួន ៤៥០គ្រួសារ ក្នុង១គ្រួសារ ទទួលបាន អង្ករ មី ត្រីខ ទឹកត្រី ទឹកស៊ីអ៊ីវ និងទឹកសុទ្ធ។