(រដ្ឋបាលខេត្តកំពង់ធំ)÷ នារសៀលថ្ងៃទី ០៧ ខែមេសា ឆ្នាំ ២០២៣ ឯកឧត្តម ងួន រតនៈ អភិបាលខេត្តកំពង់ធំ អញ្ជើញចូលរួមកិច្ចប្រជុំ ស្តីពីការត្រួតពិនិត្យនិងជំរុញការអនុវត្តគោលនយោបាយភូមិ សង្កាត់មានសុវត្ថិភាព ក្រោមអធិបតីភាព ឯកឧត្តម អ៊ុត សំអន រដ្ឋលេខាធិការក្រសួងមហាផ្ទៃ នៅសាលប្រជុំសាលាខេត្តកំពង់ធំ។
លោកឧត្តមសេនីយ៍ទោ ម៉ែន លី ស្នងការនគរបាលខេត្តកំពង់ធំ បានឡើងធ្វើសេចក្ដីរាយការណ៍អំពីលទ្ធផលការអនុវត្តគោលនយោបាយភូមិ សង្កាត់មានសុវត្ថិភាពក្នុងឆ្នាំ២០២២និងដាក់ចេញនូវទិសដៅសម្រាប់អនុវត្តបន្តឆ្នាំ២០២៣របស់ស្នងការដ្ឋាននគរបាលខេត្ត។
ឯកឧត្តម ងួន រតនៈ ថ្លែងថា ការត្រួតពិនិត្យ និងជំរុញការអនុវត្តគោលនយោបាយភូមិ ឃុំ សង្កាត់មានសុវត្ថិភាពនាពេលនេះ គឺជាផ្នែកមួយនៃការយុទ្ធសាស្រ្តរបស់រាជរដ្ឋាភិបាលក្នុងការកែលម្អគោលនយោយបាយភូមិ ឃុំ សង្កាត់ឲ្យកាន់តែប្រសើរ ហើយក៏ជាឱកាសអាចឲ្យយើងទាំងអស់គ្នា ពិនិត្យឡើងវិញនូវចំណុចល្អៗ និងចំណុចខ្វះខាត ដែលត្រូវការកែលម្អដើម្បីបន្តថែរក្សា សន្តិសុខ សណ្តាប់ធ្នាប់ នៅតាមមូលដ្ឋានឲ្យកាន់តែប្រសើរឡើង ។
ឯកឧត្តម ងួន រតនៈ បន្ថែមទៀតថា សម្រាប់ឆ្នាំ ២០២២នេះ ឃុំ-សង្កាត់ ទាំង៨១ឃុំ/សង្កាត់ ក្នុងខេត្តកំពង់ធំ ដែលបានអនុវត្ត គោល នយោបាយភូមិ-ឃុំ/សង្កាត់ មាន សុវត្ថិភាព សុទ្ធ តែ ទទួល បាន ចំណាត់ ក្នុងនោះ ចំណាត់លេខ១ មានចំនួន ៧៤ ឃុំ /សង្កាត់ និង ចំណាត់លេខ ២ មានចំនួន ០៥ ឃុំ-សង្កាត់ និងចំណាត់ថ្នាក់លេខ៣ មាន ០២ឃុំ។
ឯកឧត្តម អ៊ុត សំអន រដ្ឋលេខាធិការក្រសួងមហាផ្ទៃមានប្រសាសន៍ថា ផ្អែកតាមអនុសាសន៍ដ៏ថ្លៃថ្លារបស់សម្ដេច អគ្គមហាសេនាបតីតេជោហ៊ុនសែនបានកំណត់យកនូវគោលការណ៍កសាងភូមិឃុំមានសុវត្ថិភាព ដើម្បីជំរុញនិងលើកកម្ពស់ការពារសន្តិសុខសណ្ដាប់ធ្នាប់សាធារណៈ នៅគ្រប់ច្រកល្ហកទូទាំងព្រះរាជាណាចក្រកម្ពុជា ផ្អែកតាមអនុសាសន៍ដ៏ថ្លៃថ្លានេះ ក្រសួងមហាផ្ទៃបានកំណត់ដាក់ចេញនូវ គោលនយោបាយដែលជាគោលដៅអទិភាពសំដៅលើកកម្ពស់ពង្រឹងសន្តិសុខសណ្ដាប់ធ្នាប់សាធារណៈនិងសង្គម ការពារនិងទប់ស្កាត់គ្រោះមន្តរាយព្រមទាំងជំងឺឆ្លងនានា ឲ្យបានល្អប្រសើរ នៅគ្រប់ ភូមិឃុំសង្កាត់ទូទាំងប្រទេស។
ឯកឧត្តមរដ្ឋលេខាធិការ បន្តថាក្នុងដំណាក់ការនៃការចាប់ផ្ដើមគោលនយោបាយភូមិឃុំមានសុវត្ថិភាព បានកំណត់នូវលក្ខណៈសម្បត្តិ៥យ៉ាងរួមមាន ១.គ្មានសកម្មភាពលួចឆក់ប្លន់គ្រប់ប្រភេទ ២.គ្មានការពិនិត្យចែកចាយនិងប្រើប្រាស់គ្រឿងញៀនគ្រប់ប្រភេទ ៣.គ្មានអំពើអាណាចារ ជួញដូរស្ត្រីកុមារនិងអំពើហិង្សាក្នុងគ្រួសារ ៤.គ្មានក្មេងទំនើង ៥.គ្មានផ្ការាតត្បាតល្បែងស៊ីសងខុសច្បាប់ ការប្រើប្រាស់អាវុធ និងបទល្មើសគ្រប់ប្រភេទ។
ឯកឧត្តម អ៊ុត សំអន រដ្ឋលេខាធិការក្រសួងមហាផ្ទៃបានបង្ហាញនូវការកោតសរសើរ និងវាយតម្លៃខ្ពស់ចំពោះមន្ទីរ អាជ្ញាធរ អង្គភាពជំនាញនានាជុំវិញខេត្ត កងកម្លាំងមានសមត្ថកិច្ច និងអ្នកពាក់ព័ន្ធនានា ព្រមទាំង ប្រជាពលរដ្ឋគ្រប់មជ្ឈដ្ឋានដែលបានគាំទ្រ និងចូលរួមអនុវត្តគោលនយោបាយភូមិ-ឃុំ-សង្កាត់ មានសុវត្ថិភាព នាពេលកន្លងមក ដោយសម្រេចបានលទ្ធផលជាច្រើន។