(រដ្ឋបាលខេត្តកំពង់ធំ): នារសៀលថ្ងៃទី៩ ខែមេសា ឆ្នាំ២០២៣ ឯកឧត្តម ឈុន ឈន់ ប្រធានក្រុមប្រឹក្សាខេត្ត និងឯកឧត្តម ងួន រតនៈ អភិបាលខេត្តកំពង់ធំ និងលោកជំទាវ អញ្ជើញចូលរួមក្នុងពិធីសូត្រមន្ត ចម្រើនព្រះបរិត្ត ជម្រុះនូវឧបទ្រពចង្រៃក្នុងឆ្នាំចាស់ និងទទួលនូវពរជ័យសេរីមង្គលពីទេវតាឆ្នាំថ្មី ដែលនឹងឈានមកដល់នាពេលឆាប់ៗខាងមុខនេះ។
ពិធីសូត្រមន្តចម្រើនព្រះបរិត្ត គឺប្រារព្ធធ្វើឡើង ដើម្បីបួងសួងសូមឱ្យទេវតាឆ្នាំថ្មីប្រោះព្រំ ប្រសិទ្ធពរជ័យ សិរីសួស្តី ជ័យមង្គលមហាប្រសើរ ជូនដល់ថ្នាក់ដឹកនាំគ្រប់លំដាប់ថ្នាក់ កងកម្លាំងប្រដាប់អាវុធទាំងបី មន្ត្រីរាជការនិងប្រជាពលរដ្ឋទូទាំងខេត្តកំពង់ធំ ឱ្យមានសេចក្តីសុខ សេចក្តីចម្រើន ប្រាជ្ញាឈ្លាសវៃ ដើម្បីបន្តបំពេញតួនាទី ភារកិច្ចជូនស្ថាប័ន ឱ្យទទួលបានជោគជ័យថ្មីៗបន្ថែមទៀត។
ក្នុងពេលវេលានោះដែរ ថ្នាក់ដឹកនាំខេត្តកំពង់ធំក៏បានសំណេះសំណាលជាមួយមន្ត្រីរាជការ ព្រមទាំងបានផ្ដល់នូវថវិកាលើកទឹកចិត្តជូនដល់មន្ត្រីរាជការទាំងអស់នៅក្នុងរចនាសម្ព័ន្ធសាលាខេត្តកំពង់ធំផងដែរ ។
ក្នុងនាមក្រុមប្រឹក្សាខេត្ត ឯកឧត្តមអភិបាលខេត្ត ឯកឧត្តម សូមថ្លែងអំណរគុណ ដល់ថ្នាក់ដឹកនាំខេត្ត និងមន្ត្រីទាំងអស់ ក្នុងរយៈពេលមួយឆ្នាំកន្លងមកនេះ ដែលបាន ខិតខំបំពេញភារកិច្ចរបស់ខ្លួនដោយស្មារតីយកចិត្តទុកដាក់ ធ្វើឲ្យរដ្ឋបាលខេត្ត និងខេត្តទាំងមូលទទួលបាននូវលទ្ធផលផ្លែផ្កាយ៉ាងល្អប្រសើរ ។