(រដ្ឋបាលខេត្តកំពង់ធំ)៖ ឯកឧត្តម ងួន រតនៈ អភិបាលខេត្តកំពង់ធំ នាព្រឹកថ្ងៃទី ២៩ ខែមេសា ឆ្នាំ២០២៣ ដឹកនាំកិច្ចប្រជុំត្រួតពិនិត្យផែនការ និងវឌ្ឍនភាពនៃការរៀបចំព្រះរាជពិធីបុណ្យច្រត់ព្រះនង្គ័ល ដែលនឹងប្រព្រឹត្តទៅនៅថ្ងៃទី៨ ខែឧសភា ឆ្នាំ២០២៣ ស្ថិតនៅភូមិរូង ឃុំត្រពាំងឫស្សី ស្រុកកំពង់ស្វាយ ខេត្តកំពង់ធំ។
ឯកឧត្តម ងួន រតនៈ បន្ថែមទៀតថា ព្រះរាជពិធីបុណ្យច្រត់ព្រះនង្គ័ល គឺមានរយៈពេលសល់តែ ៩ថ្ងៃទៀតប៉ុណ្ណោះ ហើយកន្លងទៅ យើងបានចូលរួមធ្វើសកម្មភាពរៀបចំព្រះរាជពិធីបុណ្យនេះយ៉ាងយកចិត្តទុកដាក់។ ចំពោះការងារដែលនៅសេសសល់ យើងនាំគ្នាធ្វើបង្ហើយ និងទទួលផែនការថ្មីបន្តទៀត ដើម្បីបំពេញផែនការរបស់យើង ទាំងកិច្ចសហការ ទាំងកិច្ចការដែលយើងត្រូវធ្វើបន្តទៀត ធ្វើយ៉ាងណាឲ្យដំណើររៀបចំព្រះរាជពិធីបុណ្យច្រត់ព្រះនង្គល់ ប្រព្រឹត្តទៅដោយរលូន និងទទួលបានជោគជ័យ។
ឯកឧត្តម អភិបាលខេត្តកំពង់ធំ បន្ថែមទៀតថា ខេត្តកំពង់ធំ ក្រៅពីព្រះរាជពិធីបុណ្យច្រត់ព្រះនង្គ័ល យើងនឹងធ្វើពិធីទទួលព្រះអគ្គិជ័យកីឡា ដែលនឹងត្រូវមកដល់ខេត្តកំពង់ធំនៅថ្ងៃទី៤ ខែឧសភា ឆ្នាំ២០២៣ ខាងមុខនេះ ដែលត្រូវឲ្យអាជ្ញាធរដែនដី ត្រៀមរៀបចំតាមផែនការឲ្យច្បាស់លាស់ និងត្រៀមបងប្អូនប្រជាពលរដ្ឋឈរអមតាមដងផ្លូវ ព្រមទាំងមានកាន់ទង់ជាតិសម្រាប់ក្រវីឲ្យបានគ្រប់ៗគ្នា ដើម្បីអបអរសាទរក្នុងពិធីដង្ហែរព្រះអគ្គីជ័យកីឡានេះ ឲ្យបានអធឹកអធម ។
