(រដ្ឋបាលខេត្តកំពង់ធំ)៖ ក្រុមប្រឹក្សាខេត្តកំពង់ធំ បើកវេទិការផ្សព្វផ្សាយ និងពិគ្រោះយោបល់នៅស្រុកបារាយណ៍ ដើម្បីលើកកម្ពស់គណនេយ្យ តម្លាភាព និងការឆ្លើយតបរបស់ក្រុមប្រឹក្សាខេត្ត ជាមួយនឹងប្រជាពលរដ្ឋរបស់ខ្លួន ក្នុងដំណើរការ អភិបាលកិច្ច និងកិច្ចអភិវឌ្ឍន៍មូលដ្ឋាន ក្នុងន័យដើម្បីធានាថា៖
១* រាល់បញ្ហាអាទិភាពរបស់ប្រជាពលរដ្ឋក្នុងមូលដ្ឋានបានពិនិត្យ និងដោះស្រាយ និងឆ្លើយតប (បានឬមិនបាន)
២* គ្រប់អ្នកពាក់ព័ន្ធទាំងអស់ក្នុងមូលដ្ឋានបានចូលរួមក្នុងដំណើរការអភិវឌ្ឍតាមបែបប្រជាធិបតេយ្យ។
នៅក្នុងអង្គពិធីនេះ ក៏មានការអញ្ជើញចូលរួមពីឯកឧត្តម ងួន រតនៈ អភិបាលខេត្តកពង់ធំ និងលោកជំទាវ សុខ ចន្ទធូ សមាជិកក្រុមប្រឹក្សាខេត្ត ព្រមទាំងថ្នាក់ដឹកនាំមន្ទីរជំនាញជុំវិញខេត្ត ថ្នាក់ដឹកនាំស្រុក កងកម្លាំងប្រដាប់អាវុធទាំងបី លោកមេឃុំ លោកមេភូមិ អង្គការសង្គមស៊ីវិល ជាច្រើនរូប នាព្រឹកថ្ងៃទី១៧ ខែតុលា ឆ្នាំ២០២៣ នៅសាលាស្រុកបារាយណ៍ ។
វេទិកាផ្សព្វផ្សាយនិងពិគ្រោះយោបល់នាថ្ងៃនេះគឺជាការផ្តល់ឱកាសជូនប្រជាពលរដ្ឋបានប្រាស្រ័យទាក់ទងគ្នាទៅវិញទៅមកជាមួយរដ្ឋបាលខេត្តរដ្ឋបាលក្រុង ស្រុក រដ្ឋបាលឃុំសង្កាត់តំណាងសង្គមស៊ីវិល និងវិស័យឯកជនដើម្បីផ្លាស់ប្តូរនូវបទពិសោធន៍ និងផ្តល់ប្រឹក្សាអំពីអាទិភាពនៃការអភិវឌ្ឍខេត្តកំពង់ធំប្រកបដោយចីរភាព និងប្រសិទ្ធភាព និងលើកឡើងនូវមតិយោបល់សំណើសំណូមពរ និងអនុសាសន៍នានាសម្រាប់កែលម្អដល់ការអភិវឌ្ឍមូលដ្ឋាននៃខេត្តកំពង់ធំនេះឲ្យបានផុលផុស ព្រោះយើងទាំងអស់គ្នាចង់បាននូវការផ្តល់សេវាសាធារណៈពីរដ្ឋបាលខេត្តរដ្ឋបាលក្រុង រដ្ឋបាលស្រុក និងរដ្ឋបាលឃុំសង្កាត់ ឲ្យបានកាន់តែល្អប្រសើរឡើង។
សូមបញ្ជាក់ផងដែរថា៖ វេទិកាផ្សព្វផ្សាយនិងពិគ្រោះយោបល់នាថ្ងៃនេះ មានចំនួន ៣ស្រុក ក្នុងនោះរួមមាន ស្រុកបារាយណ៍ ស្រុកតាំងគោក និងស្រុកស្ទោង ។ ហើយស្រុកនីមួយៗទទួលបានសំណួរជាច្រើនដូចជា
១* ស្រុកបារាយណ៍ សរុបមាន ១៤សំណួរ ក្នុងនោះ មានសំណូមពរចំនួន ១០ មានសំណួរចំនួន ៣ និងសំណួរផ្ទាល់មាត់ចំនួន ១។
២* ស្រុកស្ទោង សរុបមាន ៣៦សំណួរ ក្នុងនោះ មានសំណូមពរចំនួន ១៥ មានសំណួរចំនួន ២១ ។
៣* ស្រុកតាំងគោក មានចំនួន ១១សំណួរ។