(រដ្ឋបាលខេត្តកំពង់ធំ)៖ ឯកឧត្តម ងួន រតនៈ អភិបាលខេត្តកំពង់ធំ បានជម្រុញអោយមន្ត្រីជំនាញ សហការជាមួយអាជ្ញាធរមូលដ្ឋានខិតខំបន្តដោះស្រាយបញ្ហាប្រឈម និងទុក្ខកង្វល់របស់ប្រជាពលរដ្ឋ ដែលបាននឹងកំពុងជួបប្រទះនៅតាមមូលដ្ឋាន ជាពិសេស សំណួរ និងសំណូមពរដែលបានលើកឡើងនៅក្នុងកម្មវិធីវេទិការផ្សព្វផ្សាយពិគ្រោះយោបល់របស់ក្រុមប្រឹក្សាខេត្ត ដែលយើងមិនទាន់បានឆ្លើយបំភ្លឺអស់ ក៏ដូចជាមិនទាន់បានដោះស្រាយចប់នៅឡើយ។ ហើយចំពោះបញ្ហា និងសំណូមពរខ្លះ យើងត្រូវត្រួតពិនិត្យទៅលើលទ្ធភាពរបស់អាជ្ញាធរខេត្តផងដែរ។ ម្យ៉ាងវិញទៀត ក្នុងនាមអាជ្ញាធរដែនដី ត្រូវចុះមើលអោយដល់មូលដ្ឋានរបស់ខ្លួន ក្នុងការដោះស្រាយបញ្ហាទំនាស់ ក៏ដូចជាការបង្ការទប់ស្កាត់ ការរំលោភយកចំណីផ្លូវ ប្រឡាយ លូ អាងស្តុបទឹក ដើម្បីរក្សាសណ្តាប់ធ្នាប់សារណៈឲ្យបានល្អ។
ប្រសាសន៍ដ៏មានអត្ថន័យនេះ លើកឡើងនៅក្នុងកិច្ចប្រជុំសាមញ្ញលើកទី៥៤ របស់ក្រុមប្រឹក្សាខេត្តកំពង់ធំ អាណត្តិទី៣ ក្រោមអធិបតីភាព ឯកឧត្តម ឈុន ឈន់ ប្រធានក្រុមប្រឹក្សាខេត្ត និងឯកឧត្តម ងួន រតនៈ អភិបាលខេត្តកំពង់ធំ ដោយមានការអញ្ជើញចូលរួមពីឯកឧត្តម លោកជំទាវសមាជិកក្រុមប្រឹក្សាខេត្ត អភិបាលរងខេត្ត នាយក នាយករងរដ្ឋបាលសាលាខេត្ត អភិបាលក្រុង ស្រុក កងកម្លាំងប្រដាប់អាវុធទាំងបីប្រភេទ មន្ទីរអង្គភាពជុំវិញខេត្ត នាយកទីចាត់ការ អង្គភាពចំណុះ សាលាខេត្ត និងមន្រ្តីពាក់ព័ន្ធ នាព្រឹកថ្ងៃទី០៧ ខែធ្នូ ឆ្នាំ២០២៣ នៅសាលប្រជុំសាលាខេត្ត។
សូមបញ្ជាក់ផងដែរថា៖ នៅក្នុងកិច្ចប្រជុំនេះដែរ មានរបៀបវារៈសំខាន់ៗ ចំនួន ០៤ គឺ៖
១- ពិនិត្យ និងអនុម័ត កំណត់ហេតុនៃកិច្ចប្រជុំសាមញ្ញលើកទី ៥៣ របស់ក្រុមប្រឹក្សាខេត្ត
២- ពិនិត្យ និងអនុម័ត របាយការណ៍ ស្តីពី វេទិកាផ្សព្វផ្សាយ និងពិគ្រោះយោបល់របស់ ក្រុមប្រឹក្សាខេត្តកំពង់ធំអាណត្តិទី៣ ឆ្នាំ២០២៣
៣- ពិនិត្យ និងអនុម័ត របាយការណ៍ប្រចាំខែ វិច្ឆិកា ឆ្នាំ២០២៣ របស់រដ្ឋបាលខេត្ត
៤- បញ្ហាផ្សេងៗ
