(រដ្ឋបាលខេត្តកំពង់ធំ)៖ ឯកឧត្តម ងួន រតនៈ អភិបាលខេត្តកំពង់ធំ នាំយកសម្ភារសិក្សាចែកជូនសិក្សានុសិស្សចំនួន ៥២៤នាក់ នៅសាលាបឋមសិក្សាកំពង់ធំ និងអនុវិទ្យាល័យកំពង់រទេះ ស្ថិតនៅក្នុងភូមិកំពង់ធំ សង្កាត់កំពង់រទេះ ក្រុងស្ទឹងសែន ខេត្តកំពង់ធំ នារសៀលថ្ងៃទី០៧ ខែធ្នូ ឆ្នាំ២០២៣។
នៅក្នុងឱកាសនោះ ឯកឧត្ដម ងួន រតនៈ ថ្លែងថា កុមារ គឺជាធនធានមនុស្សសំខាន់ ហើយក៏ជាទំពាងស្នងឫស្សីដែលមិនអាចខ្វះបានសម្រាប់ការអភិវឌ្ឍប្រទេសជាតិនាពេលអនាគត់ ហេតុនេះយើងត្រូវតែផ្តល់កិច្ចការពារ និងអភិវឌ្ឍកុមារអោយបានល្អប្រសើរ។
ជាមួយនេះផងដែរ ឯកឧត្ដម ក៏បានថ្លែងអំណរគុណយ៉ាងជ្រាលជ្រៅដល់ លោកនាយក លោកគ្រូ អ្នកគ្រូ ដែលបានខិតខំយកចិត្តទុកដាក់អស់ពីកម្លាំងកាយចិត្ត ក្នុងការបង្ហាត់បង្រៀន សិក្សានុសិស្សរហូតទទួលបានលទ្ធផល គួរឲ្យមានមោទនភាពគ្រប់ៗគ្នា ក៏ដូចជាការឆ្លើយតបទៅនឹងគោលនយោបាយរបស់ក្រសួងអប់រំយុវជន និងកីឡា ក៏ដូចជាយុទ្ធសាស្ត្ររបស់រាជរដ្ឋាភិបាល ក្រោមការដឹកនាំដ៏ឈ្លាសវៃរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា។
លើសពីនេះ ឯកឧត្ដម អភិបាលខេត្តកំពង់ធំ បានជម្រុញដល់អាជ្ញាធរមូលដ្ឋាន ចុះត្រួតពិនិត្យប្រព័ន្ធលូបង្ហូរក្នុងសាលា ដើម្បីរំដោះទឹកភ្លៀងជានៅក្នុងរដូវវស្សានៅឆ្នាំក្រោយ ដើម្បីមានភាពងាយស្រួលដល់ សិស្សានុសិស្ស និងលោកគ្រូ អ្នកគ្រូផងដែរ។
គួរបញ្ជាក់ផងដែរថា សិស្សានុសិស្សដែលទទួលបានសម្ភារៈសរុប ៥២៤នាក់ ស្រី២៥៣នាក់ ក្នុងនោះមាន សិស្សានុសិស្ស បឋមសិក្សា ៣៤៤នាក់ សិស្សស្រី ១៦៩នាក់ និងសិស្សានុសិស្ស អនុវិទ្យាល័យ ១៨០នាក់ សិស្សស្រី ៨៤នាក់ សម្ភារៈសិក្សារួមមាន៖ – សៀវភៅ ២១០០ ក្បាល, – ប៊ិច ៣៥០ដើម និងទឹកប្រាក់ឧបត្ថម្ភ ១,០០០,០០០៛។
