(រដ្ឋបាលខេត្តកំពង់ធំ )៖ នាព្រឹកថ្ងៃទី២៨ ខែវិច្ឆិកា ឆ្នាំ២០២១ មានបេក្ខជន បេក្ខនារី ចំនួន ៤១១រូប ចូលរួមប្រឡងប្រជែងបម្រើការងារក្នុងក្របខ័ណ្ឌមន្ត្រីរាជការស៊ីវិលក្រសួងមហាផ្ទៃ នៅខេត្តកំពង់ធំ ។
ពិធីនេះក៏មានការអញ្ជើញចូលរួមផ្ដល់ជាកិត្តិយសបើកវិញ្ញាសារ ក្រោមអធិបតីភាពឯកឧត្តម ញឹក បានខេង អភិបាលរងខេត្ត និងលោកជំទាវ លំ គន្ធារី អភិបាលរងខេត្ត តំណាងឯកឧត្តម ងួន រតនៈ អភិបាលខេត្តកំពង់ធំ និងថ្នាក់ដឹកនាំជាច្រើនរូបផ្សេងទៀត នៅវិទ្យាល័យកំពង់ធំ ។
ជាមួយគ្នានោះដែរ ឯកឧត្តម ញឹក បានខេង និងលោកជំទាវលំ គន្ធារី បានស្នើឲ្យបេក្ខជន បេក្ខនារី ប្រឡងនាពេលនេះត្រូវប្រើប្រាស់សមត្ថភាពផ្ទាល់ខ្លួនយ៉ាងពិតប្រាកដ ក្នុងការទប់ស្កាត់អំពើពុករលួយផ្សេងៗ ដែលនាំឲ្យខាតប្រយោជន៍ខ្លួននាពេលខាងមុខ ។
ឯកឧត្តមអភិបាលរងបន្ថែមទៀតថា ដើម្បីធានានូវសុវត្ថិភាព និងទប់ស្កាត់ការឆ្លងរីករាលដាល នៃជំងឺកូវីដ-១៩ នៅក្នុងកិច្ចដំណើរការប្រឡង គណៈកម្មការរៀបចំការប្រឡង អនុគណៈកម្មការនានា និងបេក្ខជនត្រូវពាក់ប័ណ្ណចាក់វ៉ាក់សាំងការពារជំងឺកូវីដ ១៩ ឱ្យបានគ្រប់ៗគ្នា បើមានបេក្ខជនណា ដែលមិនមានប័ណ្ណចាក់វ៉ាក់សាំងការពារជំងឺកូវីដ ១៩ មិនអនុញ្ញាតឱ្យចូលក្នុងមណ្ឌលប្រឡង ឬបន្ទប់ប្រឡងឡើយ។
ទន្ទឹមនឹងនោះឯកឧត្តម ញឹក បានខេង និងលោកជំទាវ លំ គន្ធារី បានសង្កត់ធ្ងន់ថា មន្ត្រីដែលមានតួនាទី ភារកិច្ចធ្វើជាគណកម្មការ អនុគណៈកម្មការ ក្នុងការប្រឡង ត្រូវយកចិត្តទុកដាក់អនុវត្តតាមតួនាទី ភារកិច្ចតាមដំណាក់កាលនីមួយៗ ប្រសិនបើមានកិច្ចការលើសពីដែនសមត្ថកិច្ចទទួលខុសត្រូវ ត្រូវស្នើសុំទៅប្រធានគណៈកម្មការ ដើម្បីរួមគ្នាដោះស្រាយបានទាន់ពេលវេលា តាមគោលការណ៍ និងលក្ខន្តិកៈនៃការប្រឡងតាមឋានានុក្រម។
គួរបញ្ជាក់ថា ការប្រឡងជ្រើសរើសមន្ត្រីរាជការខេត្តកំពង់ធំ ប្រចាំឆ្នាំ២០២១ នាពេលនេះមានបេក្ខជនដាក់ពាក្យប្រឡង សម្រាប់ក្របខ័ណ្ឌមន្រ្តីរដ្ឋបាលជាន់ខ្ពស់ (ប្រភេទក្របខ័ណ្ឌ ក ) ចំនួន ៤៩នាក់ មន្រ្ដីក្រមការ (ប្រភេទក្របខ័ណ្ឌ ខ ) ចំនួន ១១០នាក់ លេខាធិការរដ្ឋបាល (ប្រភេទក្របខ័ណ្ឌ គ ) ចំនួន ២៥២នាក់។