(រដ្ឋបាលខេត្តកំពង់ធំ) ៖ អភិបាលខេត្តកំពង់ធំ បានថ្លែងថាមន្ត្រីជំនាញទាំងអស់ត្រូវរួមគ្នាដោះស្រាយបញ្ហាប្រឈមនានាជូនប្រជាពលរដ្ឋអោយបានឆាប់រហ័ស នៅក្នុងមូលដ្ឋានរបស់ខ្លួន។
ឯកឧត្តម ងួន រតនៈ បានថ្លែងយ៉ាងដូច្នេះក្នុងកិច្ចប្រជុំប្រចាំខែរបស់គណៈបញ្ជាឯកភាពរដ្ឋបាលខេត្តកំពង់ធំ នាព្រឹកថ្ងៃទី០៣ ខែកុម្ភៈ ឆ្នាំ២០២២នេះ ដោយមានការអញ្ជើញចូលរួមពីមន្ត្រីពាក់ព័ន្ធជុំវិញខេត្តជាច្រើនរូបផងដែរ ។
ឯកឧត្តមបន្តថា សូមមន្ត្រីជំនាញគ្រប់រូបត្រូវពិនិត្យរាល់ការងារក្នុងមូលដ្ឋានទាំងអស់ កុំទុកយូររាល់ការងារអ្វីណាមួយដែលមិនអាចដោះចេញនោះ សូមរាយការណ៍បន្ទាន់ឬបញ្ជូនមកថ្នាក់លើ យើងទាំងអស់គ្នា រួមគ្នាដោះស្រាយទាំងអស់គ្នា និងចូលរួមថែរក្សាសុខសន្តិភាព ស្ថិរភាពនយោបាយ និងព្រមទាំងទប់ស្កាត់ប្រឆាំងដាច់ខាតសកម្មភាពនានា អាជ្ញាធរនិងកងកម្លាំងមានសមត្ថកិច្ចគ្រប់លំដាប់ថ្នាក់ត្រូវបន្តថែរក្សាពង្រឹងសន្តិសុខ សណ្តាប់ធ្នាប់សាធារណៈសុវត្ថិភាពសង្គមឲ្យបានល្អប្រសើរក្នុងការចូលរួមអនុវត្តគោលនយោបាយ ភូមិ ឃុំឲ្យមានសុវត្ថិភាព និងមានការចូលរួមពីប្រជាពលរដ្ឋនៅមូលដ្ឋាន។ ត្រូវរៀបចំការកែលម្អសួនច្បារនានា ត្រូវស្តារឬជួសជុលឡើងវិញ ព្រោះខេត្តយើងក៏ត្រូវមានការចូលរួមប្រឡងប្រណាំងទីក្រុងស្អាត ធ្វើយ៉ាងណាប្តេជ្ញាយកផ្ការំដួលបីទងអោយខានតែបាន ។
ឯកឧត្តមអភិបាលខេត្តកំពង់ធំ បានស្នើដល់អាជ្ញាធរក្រុងស្រុក និងមន្ទីរទាំងអស់ ម្ចាស់ការលើការដាំដើមឈើស្ដារឡើងវិញនៅក្នុងនៅតំបន់ ៣ ដែលបានដកហូតពីប្រជាពលរដ្ឋនិងឈ្មួញខិលខូចមួយចំនួន ។
ក្នុងនោះឯកឧត្តមបានបន្ថែមថាត្រូវជំរុញការផ្សព្វផ្សាយការងារផ្តល់វ៉ាក់សាំងការពារមេរោគកូវិដ១៩ ដែលប្រជាពលរដ្ឋមិនបានចូលរួមមកទទួលវ៉ាក់សាំងនៅមានកម្រិតទាបដើម្បីសហគមន៍មានភាពប្រសើរឡើង ៕