(រដ្ឋបាលខេត្តកំពង់ធំ): ឯកឧត្តមទេសរដ្ឋមន្រ្តី គន់ គីម អគ្គលេខាធិការសមាគមអតីតយុទ្ធជនកម្ពុជា អមដំណើរដោយឯកឧត្តម ងួន រតនៈ អភិបាលខេត្ត និងជាប្រធានកិត្តិយសសមាគមអតីតយុទ្ធជនកម្ពុជាខេត្តកំពង់ធំ លោកឧកញ៉ា វិញ ហួរ ប្រធានក្រុមប្រឹក្សាភិបាលក្រុមហ៊ុនកំពតផត អញ្ជើញចូលរួមក្នុងពិធីប្រគល់ផ្ទះចំនួន១៥០ខ្នង ដែលទើបសាងសង់រួច មានទំហំ ៤ម៉ែត្រ គុណ៦ម៉ែត្រ សាងសង់អំពីសសរបេតុង, ឆ្អឹងដែកខ្ពស់ផុតពីដី, ជញ្ជាំងស្មាតបត, រនាបក្តារ, ដំបូលប្រក់ស័ង្កសីកិនភ្លី និងជណ្ដើរកាច់ ព្រមទាំងប្រកាសបើកការដ្ឋានសាងសង់ផ្លូវប្រវែង ១២គីឡូម៉ែត្រ ប្រព័ន្ធប្រឡាយរំដោះទឹកចេញពីភូមិដា្ឋន បងប្អូនអតីតយុទ្ធជនដែលកំពុងរស់នៅលើដីសម្បទានសង្គមកិច្ច ដែលជាអំណោយរបស់ សម្តេចតេជោ ហ៊ុន សែន នាយករដ្ឋមន្ដ្រី នៃព្រះរាជាណាចក្រកម្ពុជា ជូនដល់អតីតយុទ្ធជន ស្ថិតនៅភូមិដងក្តារ ឃុំក្រយា ស្រុកសន្ទុក ខេត្តកំពង់ធំ នាព្រឹកថ្ងៃទី១០ ខែកុម្ភ: ឆ្នាំ២០២២។
បន្ទាប់ពីឯកឧត្តមឧត្តមសេនីយ៍ទោ សោម ស៊ុន ជាប្រធានសមាគមអតីតយុទ្ធជនខេត្ត បានរាយការណ៍អំពីបច្ចុប្បន្នភាពការងារដែលចាប់ពីឆ្នាំ២០១៦ដល់ ២០២១ របស់សមាគមអតីតយុទ្ធជនខេត្ត បានជួយសាងសង់ផ្ទះជូនអតីតយុទ្ធជនក្រីក្របានចំនួន៣៤២ លើដីសម្បទានសង្គមកិច្ច១៥០ខ្នង និងចាក់វ៉ាក់សាំងជូនដល់អតីតយុទ្ធជនដូសទី១ដល់ដូសទី៣បានចំនួន៣,៩៨នាក់រួចមក។
ឯកឧត្ដម ងួន រតនៈ អភិបាលខេត្តកំពង់ធំ បានថ្លែងអំណរគុណដ៍ជ្រាលជ្រៅជាទីបំផុតចំពោះសម្តេចតេជោ ហ៊ុន សែន និងសម្តេចកិត្តិព្រឹទ្ឋបណ្ឌិត ប៊ុន រ៉ានី ហ៊ុន សែន សម្ដេចតែងតែគិតគូរពីសុខទុក្ខរបស់ពួកគាត់ទាំងជីវភាពរស់នៅ ទាំងសុខភាព ផ្តល់ផ្ទះផ្តល់ដីដល់ពួកគាត់ ដែលមានជីវភាពខ្វះខាត ផ្តល់ប័ណ្ណ ប.ស.ស សម្រាប់ព្យាបាលជំងឺនៅតាមមន្ទីរពេទ្យដោយមិនអស់ប្រាក់ និងជាពិសេសសូមថ្លែងអំណរគុណដល់ឯកឧត្ដមទេសរដ្ឋមន្រ្តី គន់ គីម និងលោកឧកញ៉ា វិញ ហួរ ដែលបានជួយឧបត្ថម្ភជូនបងប្អូនអតីតយុទ្ធជនចំនួន ១៥០គ្រួសារ ដោយក្នុងមួយគ្រួសារទទួលបាននូវអង្ករចំនួន ១០០គីឡូក្រាមថវិកាចំនួន ២០០.០០០ រៀល និងគ្រឿងឧបភោគបរិភោគសម្ភារៈប្រើប្រាស់សរុបចំនួន ១៦មុខផ្សេងទៀត។
ឆ្លៀតនៅក្នុងឱកាសនោះឯកឧត្តមទេសរដ្ឋមន្ដ្រី គន់ គីម ក៏បាននាំនូវការផ្តាំផ្ញើសួរសុខទុក្ខពី សម្តេចតេជោ ហ៊ុន សែន ជូនដល់អតីតយុទ្ធជន ដែលរស់នៅទីនេះទាំងអស់គ្នា និងផ្តាំផ្ញើដល់បងប្អូនដែលទើបបានទទួលផ្ទះថ្មី ត្រូវខិតខំដាំដំណាំចិញ្ចឹមសត្វលើផ្ទៃដីដែលមានស្រាប់ ដើម្បីជួយជីវភាពគ្រួសារ និងត្រូវចេះសាមគ្គី ជួយគ្នាពេលមានធុរៈ។ ឯកឧត្តមទេសរដ្ឋមន្រ្តី ថ្លែងអំណរគុណដល់ថ្នាក់ដឹកនាំ អាជ្ញាធរដែនដី មន្ទីរស្ថាប័នពាក់ព័ន្ធនានាដែលបានខិតខំប្រឹងប្រែងបំពេញភារកិច្ចសម្រចបានជោគជ័យ និងបានណែនាំឲ្យសមាគមអតីតយុទ្ធជនខេត្ត ចុះពិនិត្យរកមើលសមាជិក ដែលអត់ដី អត់ផ្ទះពិតប្រាកដ ដើម្បីគោរពស្នើសុំ សម្តេចតេជោ ហ៊ុន សែន សាងសង់ជូនបន្ថែមទៀត។
ចុងក្រោយឯកឧត្ដមទេសរដ្ឋមន្រ្តី គន់ គីម និង ឯកឧត្ដម ងួន រតនៈ អភិបាលខេត្តកំពង់ធំ បានបញ្ជាគ្រឿងចក្របេីកការដ្ឋានសាងសង់ផ្លូវនិងប្រព័ន្ធប្រឡាយរំដោះទឹកនៅក្នុងទីតាំងដីសម្បទានសង្គមកិច្ចជូន បងប្អូនអតីតយុទ្ធជនយេីងដេីម្បីសម្រួលដល់ជីវភាពរស់នៅរបស់បងប្អូនចាប់ពីពេលនេះតទៅ ។
