(រដ្ឋបាលខេត្តកំពង់ធំ)÷ ឯកឧត្តម ឈុន ឈន់ ប្រធានក្រុមប្រឹក្សាខេត្តកំពង់ធំ ឯកឧត្តម ងួន រតនៈ អភិបាលខេត្ត កំពង់ធំ ឯកឧត្តម ឃឹង នុភាព តំណាងរាស្ត្រមណ្ឌលកំពង់ធំ បានអញ្ជើញជាអធិបតីភាពក្នុងពិធីជួបសំណេះសំណាល និងសួរសុខទុក្ខបងប្អូនប្រជាពលរដ្ឋក្រីក្រ១ និងក្រីក្រ២ ប្រមាណ៥០០នាក់ ស្ថិតនៅក្នុងឃុំគោល ស្រុកប្រាសាទសំបូរ ខេត្តកំពង់ធំ នាព្រឹកថ្ងៃទី១២ ខែឧសភា ឆ្នាំ២០២២។
បន្ទាប់ពីលោក ទង់ គឹមតុល អភិបាលស្រុកប្រាសាទសំបូរបានឡើងធ្វើរបាយការណ៍សង្ខេបជូនអង្គពិធី អំពីស្ថានភាពភូមិសាស្រ្តក្នុងស្រុក និងស្ថានភាពរបស់ប្រជាពលរដ្ឋរួចមក ឯកឧត្តមងួន រតនៈ អភិបាលខេត្តកំពង់ធំ បានជម្រាបជូនបងប្អូនប្រជាពលរដ្ឋអំពីគោលនយោបាយចាស់សកម្មភាពថ្មីលើវិស័យដីធ្លី របស់រាជរដ្ឋាភិបាល ដឹកនាំដោយសម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជាដែលគោលនយោបាយនេះ សម្រាប់បែងចែកជូនកងទ័ព និងប្រជាពលរដ្ឋក្រីក្រ គ្មានដី ឬពលរដ្ឋដែលមានដីតិចតួច តែប៉ុណ្ណោះ ។
ឯកឧត្តមបញ្ជាក់បន្ថែមទៀតថា ចំពោះបងប្អូនប្រជាពលរដ្ឋក្រីក្រដែលរស់នៅក្នុងឃុំគោល ហើយមានជីវភាពខ្វះខាត ដែលគ្មានដីពិតប្រាកដ សូមអញ្ជើញមកដាក់ពាក្យតាមរយៈលោកមេឃុំ ដើម្បីស្នើសុំដីសម្បទានសង្គមកិច្ច ។
ជាចុងក្រោយឯកឧត្តម ងួន រតនៈ បានជំរុញឲ្យអាជ្ញាធរភូមិ ឃុំ ស្រុក ខិតខំដោះស្រាយអំពីបញ្ហាប្រឈមនានាដែលប្រជាពលរដ្ឋជួបប្រទះនិងសំណូមពរ ព្រមទាំងហាមប្រជាពលរដ្ឋមិនត្រូវបន្តរុករានកាន់កាប់ដីព្រៃដែលជាដីរបស់រដ្ឋដើម្បីធ្វើជាកម្មសិទ្ធិផ្ទាល់ខ្លួនបន្តទៀតនោះទេ។