(រដ្ឋបាលខេត្តកំពង់ធំ)៖ ឯកឧត្តម ងួន រតន: អភិបាលខេត្តកំពង់ធំ អញ្ជើញចូលរួមក្នុងពិធីបើកសន្និបាតបូកសរុបវាយតម្លៃការងារអប់រំ យុវជន និងកីឡា ឆ្នាំសិក្សា ២០២០- ២០២១ និងលើកទិសដៅឆ្នាំសិក្សា ២០២១-២០២២ ដោយមានការអញ្ជើញចូលរួមពីអភិបាល ក្រុង-ស្រុក អង្គការដៃគូរនានា លោកគ្រូ អ្នកគ្រូ ជានាយក ប្រមាណជិត៣០០នាក់ នាព្រឹកថ្ងៃទី១៦ ខែមិថុនា ឆ្នាំ២០២២។
ជាមួយគ្នានោះដែរ ឯកឧត្តម ងួន រតនៈ បានថ្លែងអំណរគុណដល់ លោកគ្រូ អ្នកគ្រូ បុគ្គលិកអប់រំទូទាំងខេត្ត ដែលបានខិតខំបំពេញភារកិច្ច តាមតួនាទី និងទទួលខុសត្រូវរៀងៗខ្លួន ជាពិសេស បានអនុវត្ដន៍យ៉ាងខ្ជាប់ខ្ជួនតាមសេចក្តីណែនាំរបស់ក្រសួងអប់រំ យុវជន និងកីឡា និងវិធានការសុវត្ថិភាព សុខភាពនានា ដើម្បីធានាឱ្យសិស្សានុសិស្ស បានបន្តទទួលនូវការអប់រំតាមគ្រប់រូបភាព ឫហៅថា “ការអប់រំតាមបែបចម្រុះ” គឺសិស្សអាចរៀនបាននៅក្នុងថ្នាក់ផង រៀនពីចម្ងាយតាមប្រព័ន្ធអេឡិចត្រូនិចផង ធ្វើស្វ័យសិក្សាផង និងការអប់រំពី ចម្ងាយតាមបែបប្រពៃណី ដោយប្រើប្រាស់សន្លឹកកិច្ចការ និងមេរៀនសង្ខេប ដើម្បីឆ្លើយតបទៅនឹងតម្រូវការអភិវឌ្ឍធនធានមនុស្ស ក្នុងយុទ្ធសាស្ត្រចតុកោណ ដំណាក់កាលទី៣ របស់រាជរដ្ឋាភិបាលកម្ពុជា ។
ឯកឧត្តមបន្តទៀតថា សន្និបាតបូកសរុបវាយតម្លៃការងារអប់រំ យុវជន និងកីឡា ដែលយើងប្រារព្ធធ្វើឡើង នាពេលនេះគឺជាការបង្កលក្ខណៈ និងការផ្ដល់ឱកាសដល់សមាជិក សមាជិកាទាំងមូលបានមក ជួបជុំគ្នា ស្ដាប់របាយការណ៍បូកសរុបលទ្ធផលការងារកន្លងមក ដើម្បីបានផ្លាស់ប្តូរ បទពិសោធន៍ ពីគ្នាទៅវិញ ទៅមក ក្នុងការដោះស្រាយបញ្ហាប្រឈម និងទទួលការណែនាំពីថ្នាក់ដឹកនាំ សម្រាប់យកទៅអនុវត្ដបន្ដនៅក្នុងឆ្នាំសិក្សាថ្មី ឱ្យស្របតាមកំណែទម្រង់ស៊ីជម្រៅ របស់រាជរដ្ឋាភិបាល ។
