(រដ្ឋបាលខេត្តកំពង់ធំ)៖ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ថ្លែងថា ក្មួយៗដែលជាសិក្ខាកាមបន្ទាប់បញ្ចប់វគ្គបណ្តុះបណ្តាលនេះ បានហាត់ពត់លត់ដំកសាងខ្លួនរបស់យើង ឲ្យក្លាយជាមន្ត្រីនគរបាលដ៏ល្អម្នាក់ ខិតខំបម្រើការងារតាមជំនាញរបស់ខ្លួន សម្រេចឲ្យបាននូវបេសកកម្មដ៏ឧត្តុង្គឧត្តមរបស់ខ្លួន ជាបេសកម្មបម្រើជាតិ មាតុភូមិ បម្រើប្រជាពលរដ្ឋ ថែរក្សាសន្តិសុខសណ្ដាប់ធ្នាប់សាធារណៈជូនប្រជាពលរដ្ឋ មន្ត្រីនគរបាលជារបស់ប្រជាជន ជាកូនចៅប្រជាពលរដ្ឋ មិនមែនជាចៅហ្វាយនាយប្រជននោះទេ ត្រូវតែស្តាប់មតិយោបល់ និងចាត់ទុកប្រជាជនជាកញ្ចក់ឆ្លុះ ជាពិសេសត្រូវផ្តល់ទំនុកចិត្ត និងធ្វើឲ្យប្រជាពលរដ្ឋមានភាពជឿជាក់។
ប្រសាសន៍ដ៏មានអត្ថន័យនេះ សម្តេចក្រឡាហោម ស ខេង ថ្លែងក្នុងពិធីអញ្ជើញជួបសំណេះសំណាល និងសួរសុខទុក្ខ សិស្សនាយនគរបាល សិស្សនាយកនគរបាលរង វគ្គបណ្តុះបណ្តាលកម្រិតបឋមវិជ្ជាជីវៈនគរបាលជំនាន់ទី១៥ លើកទី២ នៅសាលានគរបាលជាតិភូមិភាគ៤ ខេត្តសៀមរាប ដោយមានការអញ្ជើញចូលរួមពីឯកឧត្តម ងួន រតន: អភិបាលខេត្តកំពង់ធំ នាព្រឹកថ្ងៃទី១៦ ខែសីហា ឆ្នាំ២០២២ ។
ជាមួយគ្នានោះដែរ សម្ដេចក្រឡាហោម ស ខេង បានទាញចំណាប់អារម្មណ៍សិស្សនគរបាលកត់សម្គាល់អំពីបទល្មើសប្រឈមៗក្នុងសង្គម និងងាយបង្កគ្រោះថ្នាក់ដល់ប្រទេសជាតិ ពិសេសបទល្មើសគ្រឿងញៀន ព្រមទាំងលើកយកពាក្យស្លោក ៣កុំ ១រាយការណ៍ រួមមាន កុំពាក់ព័ន្ធ កុំអន្តរាគមន៍ កុំលើកលែង និង១រាយការណ៍ ត្រូវរាយការណ៍ ផ្តល់ព័ត៌មាន ដល់សមត្ថកិច្ចអំពីមុខសញ្ញាជួញដូរ ចែកចាយ ប្រើប្រាស់ ទីតាំងកែច្នៃផលិតនិងទីតាំងស្តុកទុកគ្រឿងញៀនខុសច្បាប់ដល់សមត្ថកិច្ច។
សម្តេចក្រឡាហោមបញ្ជាក់ទៀតថា សព្វថ្ងៃនេះ បញ្ហាគ្រឿងញៀន ទោះបីយើងបង្រ្កាបខ្លាំងក្លាយ៉ាងណាក៏ដោយ គ្រឿងញៀននៅតែជាបទល្មើសដ៏សកកម្ម រីករាលដានដល់តាមទីជនបទ ចំណុចនេះយើងមិនត្រូវមើលស្រាលនោះទេ ដូច្នេះ សូមកងកម្លាំងមានសមត្ថកិច្ចទាំងអស់ ត្រូវអនុវត្តច្បាប់ចំពោះឧក្រិដ្ឌជនគ្រឿងញៀនឲ្យបានម៉ឺងម៉ាត់ ដើម្បីរក្សាស្ថិរភាពសង្គម និងសុវត្ថិភាពសង្គម ។
