(រដ្ឋបាលខេត្តកំពង់ធំ)៖ ឯកឧត្តម ងួន រតនៈ អភិបាលខេត្តកំពង់ធំ ដឹកនាំកិច្ចប្រជុំណែនាំ និងផ្តល់អនុសាសន៍ដល់មន្ត្រីអ្នកនាំពាក្យប្រចាំ មន្ទីរ អង្គភាព ក្រុង ស្រុក ក្នុងការអនុវត្តតួនាទីភារកិច្ចបានល្អប្រសើរ នាព្រឹកថ្ងៃទី១៩ ខែតុលា ឆ្នាំ២០២២ នៅសាលាប្រជុំសាលាខេត្តកំពង់ធំ។
ឯកឧត្តម អភិបាលខេត្តកំពង់ធំ បន្ថែមទៀតថា មន្ត្រីអ្នកនាំពាក្យ មានសារៈសំខាន់ណាស់ ក្នុងការតាមដានព័ត៌មាន នៅលើបណ្តាញសង្គម ក៏ដូចជាតាមតេឡេក្រាមជាដើម ដើម្បីយើងទទួលបានគ្រប់ព័ត៌មាន ទាំងព័ត៌មានអភិវឌ្ឍន៍ ព័ត៌មានរិះគន់ និងព័ត៌មានក្លែងក្លាយ ដើម្បីឆ្លើយតបសម្លេងតែមួយ ខ្លឹមសារតែមួយ ការសរសេរខ្លឹមសារខ្លី ខ្លឹម និងចំគោលដៅចំណុចរសើបនៃបញ្ហា យកព័ត៌មានពិត បន្សាបព័ត៌មានក្លែងក្លាយ ហើយអ្នកដែលមិនដឹង និងមិនមែនជាតួនាទី សូមកុំឆ្លើយ ជៀសវាងការឆ្លើយខុស ។ លើសពីនេះទៀត មន្ត្រីអ្នកនាំពាក្យ ត្រូវនាំពាក្យពីថ្នាក់ដឹកនាំ ជូនទៅប្រជាពលរដ្ឋ និងនាំពាក្យពីប្រជាពលរដ្ឋ មកថ្នាក់ដឹកនាំវិញ ធ្វើយ៉ាងណាឲ្យបងប្អូនប្រជាពលរដ្ឋបានទទួលព័ត៌មានពិត។