(រដ្ឋបាលខេត្តកំពង់ធំ): នាព្រឹកថ្ងៃទី២៧ ខែមីនា ឆ្នាំ២០២៣ រដ្ឋបាលខេត្តកំពង់ធំ រៀបចំពិធីសន្និបាតបូកសរុបលទ្ធផលការងារប្រចាំឆ្នាំ២០២២ និងលើកទិសដៅអនុវត្តការងារឆ្នាំ២០២៣ ក្រោមអធិបតីភាពឯកឧត្តម ឈុន ឈន់ ប្រធានក្រុមប្រឹក្សាខេត្ត និងឯកឧត្តម ងួន រតនៈ អភិបាលខេត្តកំពង់ធំ នៅសាលប្រជុំសាលាខេត្តកំពង់ធំ ។
ថ្លែងនៅក្នុងពិធីបើកសន្និបាតនេះ ឯកឧត្តម ឈុន ឈន់ ថ្លែងថា ការរៀបចំពិធីសន្និបាតនៅពេលនេះ គឺពិតជាមានអត្ថន័យ និងជាឱកាសដ៏មានសារៈសំខាន់ណាស់ សម្រាប់ធ្វើការវាយតម្លៃអំពីលទ្ធផល ការងារដែលរដ្ឋបាលខេត្តបានខិតខំប្រឹងប្រែងសម្រេចបាន និងរួមគ្នាពិនិត្យវាយតម្លៃអំពី បញ្ហាប្រឈមដែលនៅសេសសល់ សម្រាប់ជាមូលដ្ឋានក្នុងការកំណត់ទិសដៅការងារ សម្រាប់អនុវត្តកម្មវិធីកំណែទម្រង់នានារបស់រាជរដ្ឋាភិបាលឲ្យកាន់តែមានប្រសិទ្ធភាពថែម ទៀត។
ឯកឧត្តមបន្តទៀតថា លទ្ធផលសម្រេចបានក្នុងឆ្នាំ២០២២កន្លងមក គឺជាលទ្ធផលនៃកិច្ច ខិតខំអស់ ពីកម្លាំងកាយចិត្ដ ដោយឈរលើស្មារតីទទួលខុសត្រូវខ្ពស់ ក្នុងការខិតខំ បំពេញការងារតាមតួនាទី ភារកិច្ច ប្រកបដោយ ឆន្ទៈម្ចាស់ការ ភក្តីភាព មនសិការ វិជ្ជាជីវៈ និងវប្បធម៌សេវាសាធារណៈ ពីសំណាក់ថ្នាក់ដឹកនាំ មន្ត្រីរាជការ កងកម្លាំង ប្រដាប់អាវុធ ព្រមទាំងការចូលរួមពីដៃគូអភិវឌ្ឍន៍ សប្បុរសជន អ្នកពាក់ព័ន្ធនានា និងជាពិសេស គឺការ សហការ និងការចូលរួម ពីប្រជាពលរដ្ឋ ។ ទោះជាយ៉ាងនេះក្តី យើងក៏នៅមានបញ្ហាប្រឈមមួយចំនួន ដែលរដ្ឋបាល ថ្នាក់ ក្រោមជាតិរបស់ យើង និង គ្រប់ភាគីពាក់ព័ន្ធទាំងអស់ត្រូវតែសហការគ្នាដោះស្រាយ និងខិតខំពង្រឹងការអនុវត្ដ តួនាទី ភារកិច្ចរបស់ខ្លួន ឲ្យបាន ខ្ជាប់ ខ្ជួន ថែម ទៀត ។
ហើយឯកឧត្តម ឈុន ឈន់ ជឿជាក់ថា ឯកឧត្ដម លោកជំទាវ លោក លោកស្រី សមាជិក សមាជិកានៃអង្គសន្និបាត នឹងខិតខំយកអស់កម្លាំងកាយ ប្រាជ្ញា ស្មារតី ដើម្បីធ្វើការពិភាក្សាឲ្យបានផុលផុសអំពីសមិទ្ធផល បញ្ហាប្រឈម និង ដំណោះស្រាយ ព្រមជាមួយនឹងការផ្តល់បទពិសោធន៍ល្អៗ សម្រាប់ជាមូលដ្ឋានអនុវត្ត ទិសដៅការងារក្នុងឆ្នាំ២០២៣នេះ ឲ្យកាន់តែមានប្រសិទ្ធភាពថែមទៀត។
ជាមួយគ្នានោះដែរឯកឧត្តម ងួន រតនៈ បានជំរុញឲ្យអាជ្ញាធរមូលដ្ឋានទាំងអស់ ត្រូវអនុវត្តឲ្យបានម៉ឺងម៉ាត់នូវបទបញ្ជារបស់ សម្តេចតេជោនាយករដ្ឋមន្ត្រី ក្នុងការបង្រ្កាប និងទប់ស្កាត់ការកាប់ទន្រ្ទានដីរដ្ឋ ក្នុងដែនព្រៃលិចទឹកនៃតំបន់ទន្លេសាប
អនុវត្តឲ្យមានប្រសិទ្ធភាពនូវអនុក្រឹត្យ បន្ទាប់ពីដីដែលសម្ដេចបានកែសម្រួលព្រំប្រទល់ដីពីតំបន់២មកតំបន់១ ការកាត់ឆ្កៀលដីតំបន់៣ មកតំបន់២ និងការប្រើប្រាស់ដីនៅតំបន់អភិរក្សសត្វខ្សឹប ព្រមទាំងជំរុញការចុះធ្វើអត្តសញ្ញាណបណ្ណ ជូនប្រជាពលរដ្ឋឲ្យបានគ្រប់ៗគ្នា។
ជាចុងក្រោយឯកឧត្តមអភិបាលខេត្តកំពង់ធំ បានធ្វើការបែងចែកក្រុមពិភាក្សាដើម្បីប្រមូលធាតុចូលពីសមាជិកនៃអង្គសន្និបាតទៅលើរបាយការណ៍ និង ទិសដៅ ព្រមទាំងគោលការណ៍សំខាន់ៗ សម្រាប់អនុវត្តក្នុងឆ្នាំ២០២៣នេះ លើប្រធានបទ ចំនួន ៤ សំខាន់ៗ រួមមាន :
១* ការលើកកម្ពស់គុណភាព និងប្រសិទ្ធភាពក្នុងការពង្រឹងសន្តិសុខសាធារណៈនៅមូលដ្ឋាន
២* ការទប់ស្កាត់ និងបង្ក្រាបបទល្មើសធនធានធម្មជាតិ
៣* ការដោះស្រាយទំនាស់ដីធ្លី
៤* ការផ្តល់សេវាសាធារណៈ