(រដ្ឋបាលខេត្តកំពង់ធំ): ឯកឧត្តម ងួន រតនៈ អភិបាលខេត្តកំពង់ធំ អញ្ជើញជួបសំណេះសំណាលជាមួយប្រជាការពារក្នុងក្រុងស្ទឹងសែន សង្កាត់ទាំង ៨ ចំនួន ៣៣៩នាក់ នាព្រឹកថ្ងៃទី១៣ ខែមិថុនា ឆ្នាំ២០២៣។
ឯកឧត្តម ងួន រតនៈ ថ្លែងថា ប្រជាការពារ គឺជាកម្លាំងមួយដែលមិនអាចខ្វះបានក្នុងការពង្រឹង និងការពារសន្តិសុខជូនប្រជាពលរដ្ឋនៅមូលដ្ឋាន ជាពិសេសចូលរួមការពារសន្តិសុខសណ្ដាប់ធ្នាប់នៅមុនពេលបោះឆ្នោតនាពេលខាងមុខនេះ កំឡុងពេលបោះឆ្នោត ពេលរាប់សន្លឹកឆ្នោត និងដឹកជញ្ជូនសន្លឹកឆ្នោត ឱ្យបានដល់គោលដៅនិងទទួលបានជោគជ័យ។
ឯកឧត្តម អភិបាលខេត្តកំពង់ធំ លើកលើកទឹកចិត្ត កម្លាំងការពារទាំងអស់ ត្រៀមលក្ខណៈការពារតាមគោលដៅនៃការិយាល័យបោះឆ្នោត ឱ្យបានល្អ 100% ដោយមិនឱ្យជនណាម្នាក់មកបំផ្លាញលទ្ធិប្រជាធិបតេយ្យ ជាពិសេសការរារាំងប្រជាពលរដ្ឋមិនឲ្យទៅបោះឆ្នោតនោះទេ ដែលជាទង្វើមួយខុសច្បាប់យ៉ាងធ្ងន់ធ្ងរ ។ ឯកឧត្តមបន្ថែមទៀតថា ទោះបីយើងទាំងអស់គ្នាមានកាតព្វកិច្ចក្នុងការការពារក៏ដោយ ប៉ុន្តែយើងមិនត្រូវភ្លេចរូតរះចូលរួមបោះឆ្នោតនោះទេ ដើម្បីបំពេញកាតព្វកិច្ចជាពលរដ្ឋល្អម្នាក់នៅក្នុងសង្គមជាតិ។