(រដ្ឋបាលខេត្តកំពង់ធំ): ឯកឧត្តម ងួន រតនៈ អភិបាលខេត្ត និងជាប្រធានកិត្តិយសសមាគមអតីតយុទ្ធជនកម្ពុជាខេត្តកំពង់ធំ អញ្ជើញបំពាក់គ្រឿងឥស្សរិយយសជូនដល់អតីតយុទ្ធជនចំនួន ៨១៣នាក់ មកពីស្រុកចំនួន ៣ រួមមាន ស្រុកប្រាសាទបល្ល័ង្ក ស្រុកប្រាសាទសំបូរ និង ស្រុកសណ្តាន់ នារសៀលថ្ងៃទី១៧ ខែមិថុនា ឆ្នាំ២០២៣ នៅវិទ្យាស្ថានពហុបច្ចេកទេសកំពង់ឈើទាល ស្រុកប្រាសាទសំបូរ ។
ឯកឧត្តម ងួន រតនៈ បានថ្លែងអំណរគុណ ចំពោះបងប្អូនអតីតយុទ្ធជនទាំងអស់ ដែលបានបូជាឈាមស្រស់ សាច់ស្រស់លះបង់សេចក្តីសុខផ្ទាល់ខ្លួន លះបង់ប្រពន្ធ កូន ចាកចេញពីស្រុកកំណើត លះបង់គ្រប់យ៉ាង ដើម្បីការពារជាតិ មាតុភូមិ រហូតទៅដល់មានការពិការភាព មរណភាពនៅក្នុងសមរភូមិ។គុណបំណាច់ និងអ្វីដែលយើងមានថ្ងៃនេះ គឺជាការរួមចំណែកកិច្ចការខិតខំរបស់បងប្អូនអតីតយុទ្ធជន។ ក្នុងនាមយើងជាអ្នកបន្តវេន យើងត្រូវការជម្រុញលើកទឹកចិត្ត និងការយកចិត្តទុកដាក់ពីថ្នាក់ដឹកនាំគ្រប់លំដាប់ថ្នាក់ ដល់អតីតយុទ្ធជន គឺជាកត្តាដែលមិនអាចខ្វះបាន ក្នុងស្រទាប់ប្រជាជនកងកម្លាំងប្រដាប់អាវុធ ជាពិសេសស្រទាប់យុវជនដើម្បីប្រែក្លាយយុវជនជំនាន់ក្រោយក្លាយជាសសរទ្រូង និងជាអ្នកបន្តវេនប្រកបដោយឧត្តមគតិមោះមុតរឹងមាំនិងមានសេចក្តីថ្លៃថ្នូរ សម្រាប់ប្រទេសជាតិ។
ឯកឧត្តម ងួន រតនៈ បានអំពាវនាវដល់បងប្អូនអតីតយុទ្ធជនទាំងអស់ កុំភ្លេចនៅថ្ងៃទី២៣ កក្កដា ២០២៣ សូមអញ្ជើញទៅចូលរួមបោះឆ្នោតឲ្យបានគ្រប់ៗគ្នាកុំអាក់ខាន ដើម្បីកម្ពុជាទទួលបានសន្តិភាពជារៀងរហូត និងមានការអភិវឌ្ឍន៍ជាបន្តបន្ទាប់ទៀត។
សូមបញ្ជាក់ផងដែរថា ដើម្បីឆ្លើយតបនូវគុណបំណាច់ដ៏ធំធេងរបស់អតីតយុទ្ធជន រាជរដ្ឋាភិបាល បានផ្តល់គ្រឿងឥស្សរិយយស ចំនួន ៨១៣នាក់ ដែលបានអញ្ជើញមកពី៖ ស្រុកប្រាសាទបល្ល័ង្ក ចំនួន ៣៥៦ នាក់ ស្រុកប្រាសាទសំបូរ ចំនួន ១៨៥ នាក់ និងស្រុកសណ្តាន់ ចំនួន ២៧២នាក់។ ហើយចំពោះគ្រឿងឥស្សរិយយសដែលបំពាក់ជូនបងប្អូនអតីតយុទ្ធជនរួមមាន ៖ មេដាយថា្នក់មាស ចំនួន ៧៥ គ្រឿង និងមេដាយថ្នាក់ប្រាក់ ចំនួន ៧៣៨ គ្រឿង ហើយនេះគឺជាលើកទី៤ ក្នុងការផ្ដល់គ្រឿងឥស្សរិយយសជូនដល់បងប្អូនអតីតយុទ្ធជន ខេត្តកំពង់ធំ។