(រដ្ឋបាលខេត្តកំពង់ធំ)៖ ឯកឧត្តមបណ្ឌិត ថោង ខុន រដ្ឋមន្ត្រីក្រសួងទេសចរណ៍ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ធំ និងឯកឧត្តម ងួន រតនៈ អភិបាលខេត្តកំពង់ធំ នាថ្ងៃទី២៤ ខែមិថុនា ឆ្នាំ២០២៣នេះ អញ្ជើញចុះបើកការដ្ឋានសាងសង់ផ្លូវក្រាលកៅស៊ូប្រវែងជាង២២គីឡូម៉ែត្រ និងប្រកាសកែសម្រួលផ្ទៃដីចេញពីតំបន់៣ បញ្ចូលមកតំបន់២ ជូនប្រជាពលរដ្ឋនៅស្រុកតាំងគោក ខេត្តកំពង់ធំ។
ឯកឧត្តមរដ្ឋមន្ត្រី ថោង ខុន បានឱ្យដឹងថា នេះជាសមិទ្ធផលប្រវត្តិសាស្ត្រថ្មីមួយទៀតនៅក្នុងមូលដ្ឋានស្រុកតាំងគោក ខេត្តកំពង់ធំ ជាពិសេសសម្រាប់ពលរដ្ឋដែលត្រូវធ្វើដំណើររវាងផ្លូវជាតិលេខ៦ ទៅកាន់តំបន់វាលក្រាម ទៅកាន់ស្រែចម្ការ និងសម្រាប់អ្នកភូមិគោកត្របែក ដែលនឹងមានផ្លូវក្រាលកៅស៊ូដ៏រឹងមាំសម្រួលដល់ការធ្វើដំណើរ។ ឯកឧត្តមរដ្ឋមន្ត្រី បន្ថែមទៀតថា សមិទ្ធផលទាំងនេះ កើតចេញពីកិច្ចខិតខំរបស់រាជរដ្ឋាភិបាលដែលដឹកនាំដោយគណបក្សប្រជាជន ហើយសម្ដេចតេជោ ហ៊ុន សែន នាយករដ្ឋមន្ត្រីនៃយើង ក៏តែងតែគិតគូរយ៉ាងយកចិត្តទុកដាក់ចំពោះសុខទុក្ខជីវភាពរស់នៅរបស់ប្រជាជនផងដែរ។
ឯកឧត្តមរដ្ឋមន្ត្រី ក៏បានណែនាំក្រុមហ៊ុនសាងសង់អនុវត្តឱ្យបានត្រឹមត្រូវតាមកិច្ចសន្យារបស់ខ្លួន និងធានាលក្ខណៈបច្ចេកទេសស្ដង់ដា និងគុណភាពផ្លូវក្រាលកៅស៊ូ ដើម្បីធានាគុណភាពផ្លូវ និងប្រើប្រាស់ឱ្យបានយូរអង្វែង ព្រមទាំងអំពាវនាវដល់អ្នកប្រើប្រាស់ផ្លូវទាំងអស់ នៅពេលផ្លូវស្ថាបនារួចរាល់និងដាក់ឱ្យប្រើប្រាស់ សូមប្រជាពលរដ្ឋចូលរួមថែរក្សា និងការពារផ្លូវនេះឱ្យនៅគង់វង្សបានយូរ ពិសេសសូមឱ្យអ្នកបើកបររថយន្តធុនធំ រថយន្តដឹកទំនិញ កុំដឹកលើសទម្ងន់កំណត់ និងបើកបរប្រកបដោយសុវត្ថិភាព។
នាឱកាសនោះ ឯកឧត្តម ងួន រតនៈ បានលើកឡើងថា ការណ៍ដែលរដ្ឋបាលខេត្តកសាងផ្លូវជូនប្រជាពលរដ្ឋនេះ គឺដោយសារប្រទេសជាតិមានសុខសន្តិភាព មានការអភិវឌ្ឍរបស់រាជរដ្ឋាភិបាលដែលមានគណបក្សប្រជាជនកម្ពុជាជាគណបក្សឈ្នះឆ្នោត។ ឯកឧត្តមអភិបាលខេត្តកំពង់ធំ បន្តទៀតថា នេះជាយន្តការដោះស្រាយរបស់រដ្ឋបាលខេត្តជូនចំពោះប្រជាពលរដ្ឋ ដែលទទួលអនុវត្តស្របតាមគោលនយោបាយរបស់រាជរដ្ឋាភិបាល ពិសេសគឺយុទ្ធសាស្ត្រចតុកោណដំណាក់លទី៤ ដែលកំពុងខិតខំកសាងធនធានមនុស្ស អភិវឌ្ឍប្រព័ន្ធទឹក អគ្គិសនី និងកសាងហេដ្ឋារចនាសម្ពន្ធ មានផ្លូវថ្នល់ ស្ពាន សាលារៀនជាដើម។ លើសពីនេះទៀត ឯកឧត្តម អភិបាលខេត្តកំពង់ធំ បានបង្ហាញក្ដីសង្ឃឹមថា ការស្ដាបនាផ្លូវក្រាលកៅស៊ូនេះ ពិតជាមានសារសំខាន់ និងផ្ដល់ប្រយោជន៍ដល់ការភ្ជាប់ទំនាក់ទំនង ពាណិជ្ជកម្ម ការដឹកជញ្ជូន និងការរកស៉ីរវាងប្រជាពលរដ្ឋនៃស្រុកតាំងគោក ខេត្តកំពង់ធំ និងស្រុកបាធាយ ខេត្តកំពង់ចាម និងចូលរួមចំណែកដល់ការកាត់បន្ថយភាពក្រីក្រ និងលើកកម្ពស់ជីវភាពរស់នៅរបស់ប្រជាជន។
ថ្នាក់ដឹកនាំទាំងពីរក៏មិនភ្លេចអំពាវនាវដល់ប្រជាពលរដ្ឋដែលមានឈ្មោះក្នុងបញ្ជីឈ្មោះបោះឆ្នោត សូមចូលរួមបោះឆ្នោតជ្រើសតាំងតំណាងរាស្ត្រ នីតិកាលទី៧ ដែលនឹងប្រព្រឹត្តទៅនាថ្ងៃទី២៣ ខែកក្កដា ឆ្នាំ២០២៣ ឱ្យបានគ្រប់ៗគ្នា ដើម្បីគាំទ្រដំណើរការលទ្ធិប្រជាធិបតេយ្យសេរីពហុបក្សនៅកម្ពុជា។
