(រដ្ឋបាលខេត្តកំពង់ធំ): នៅថ្ងៃទី១៧ ខែកក្កដា ឆ្នាំ២០២៣ ឯកឧត្តម ងួន រតនៈ អភិបាលខេត្តកំពង់ធំ អញ្ជើញចុះពិនិត្យស្ថានភាពវេរ៉ងដារដែលបានសាងសង់រួចជាស្ថាពរ និងអនុញ្ញាតឱ្យសាងសង់វេរ៉ងដារ បន្តទៀតតាមច្រាំងស្ទឹងដងស្ទឹងសែន មានប្រវែង ១៤០ម៉ែត្រ ។
នៅក្នុងឱកាសនោះដែរ ឯកឧត្តម អភិបាលខេត្តកំពង់ធំ ថ្លែងថា ការសាងសង់វេរ៉ងដារនេះ បានលើកកម្ពស់សោភ័ណភាពក្នុងក្រុងស្ទឹងសែនឲ្យមានសម្រស់កាន់តែស្អាត មានកន្លែងអង្គុយគយគន់សម្រស់តាមដងស្ទឹងសែន ជាពិសេសដែលបានបង្ករភាពងាយស្រួលដល់បងប្អូនប្រជាពលរដ្ឋក៏ដូចជាសាធារណជនមានទីឃ្លាធំទូលាយសម្រាប់ដើរកំសាន្ត ស្រូបយកខ្យល់បរិសុទ្ធ កន្លែងហាត់ប្រាណ ក៏ដូចជាបង្កើនប្រាក់ចំណូលដល់បងប្អូនអាជីវករដែលបានលក់ដូរជាប្រចាំជារៀងរាល់ថ្ងៃ បានធ្វើឲ្យជីវភាពរបស់គាត់មានភាពប្រសើរជាងមុន ។
លើសពីនេះទៀត ឯកឧត្តម ងួន រតនៈ បានសំណូមពរដល់បងប្អូនដែលលក់ដូរតាម រទេះ រឺម៉ក និងអ្នកមកដើរកំសាន្តតាមដងស្ទឹងសែន ក៏ដូចជាទីកន្លែងតំបន់ទេសចរណ៍នានា សូមរក្សាអនាម័យឲ្យបានល្អ បរិស្ថានស្អាត នាំមកនូវសុខភាពល្អ និងសេចក្តីថ្លៃថ្នូ។ ហើយកុំភ្លេចនៅថ្ងៃទី២៣ ខែកក្កដា ខាងមុខនេះ អ្នកដែលមានឈ្មោះក្នុងបញ្ជីឈ្មោះបោះឆ្នោត សូមអញ្ជើញទៅចូលរួមបោះឆ្នោតឲ្យបានគ្រប់ៗគ្នា។
