(រដ្ឋបាលខេត្តកំពង់ធំ): ឯកឧត្តម ងួន រតន: អភិបាលខេត្តកំពង់ធំ បានអញ្ជើញប្រគល់វិញ្ញាបនប័ត្រសម្គាល់ម្ចាស់អចលនវត្ថុ ចំនួន ១៨៤៣ប័ណ្ណ ជូនប្រជាពលរដ្ឋចំនួន២ឃុំ មានឃុំត្បូងក្រពើ និងឃុំកកោះ ស្មើនឹង ៥ភូមិ នៅស្រុកសន្ទុក ខេត្តកំពង់ធំ នាព្រឹកថ្ងៃទី១៨ ខែកក្កដា ឆ្នាំ២០២៣។
នាឱកាសនោះ ឯកឧត្តម ងួន រតនៈ ថ្លែងថា ការចុះធ្វើវិញ្ញាបនបត្រសម្គាល់ម្ចាស់អចលនវត្ថុនេះ មានការស្មុគស្មាញ ហើយមន្ត្រីជំនាញទាំងអស់ ធ្វើការងារដោយប្រុងប្រយ័ត្ន ហ្មត់ចត់បំផុត ក្នុងការធ្វើប័ណ្ណកម្មសិទ្ធិចុះបញ្ជីដីធ្លីមានលក្ខណៈជាប្រព័ន្ធ សម្រាប់ភូមិនីមួយៗ រហូតសម្រេចបានផ្តល់វិញ្ញាបនប័ត្រសម្គាល់ម្ចាស់អចលនវត្ថុជូនបងប្អូនប្រជាពលរដ្ឋ ឲ្យពួកគាត់ប្រើប្រាស់ដោយស្របច្បាប់ និងមានសិទ្ធិជាអចិន្ត្រៃយ៍រហូត។
ឯកឧត្តម អភិបាលខេត្តកំពង់ធំ បញ្ជាក់ទៀតថា ប័ណ្ណកម្មសិទ្ធិនេះ ផ្តល់ជូនដល់បងប្អូនប្រជាពលរដ្ឋណាដែលបានបំពេញគ្រប់លក្ខខណ្ឌ និងបទដ្ឋានបច្ចេកទេសស្របតាមច្បាប់ និង បទដ្ឋានគតិយុត្តជាធរមាន ទើបអាចធ្វើប័ណ្ណកម្មសិទ្ធិនេះបាន ដើម្បីធានាសុវត្ថិភាព ដល់បងប្អូនប្រជាពលរដ្ឋ ជាម្ចាស់ដី និងអ្នកកាន់កាប់ដីជាក់ស្តែង មិនមានការភ័យខ្លាច។
ឯកឧត្តម ងួន រតនៈ បន្តទៀតថា ការធ្វើប័ណ្ណកម្មសិទ្ធិធីធ្លីនេះ គឺជាគោលនយោបាយដីធ្លី របស់ប្រមុខរាជរដ្ឋាភិបាលកម្ពុជា ដែលមានសម្តេចតេជោ ហ៊ុន សែន ជានាយករដ្ឋមន្រ្តីនៃព្រះរាជាណាចក្រកម្ពុជា បានយកចិត្តទុកដាក់បំផុតលើដំណើរការចុះបញ្ជីដីធ្លីនៅគ្រប់រាជធានីខេត្តទាំងអស់ ក្នុងនោះក៏មានខេត្តកំពង់ធំយើងដែរ ដើម្បីធានាសេចក្តីសុខសុវត្ថិភាពដីធ្លី ហើយការធ្វើប្លង់ដីលក្ខណៈផ្ដល់អំណោយផ្តាច់ពីឪពុកម្ដាយទៅកូន គឺមិនមានការបង់ប្រាក់នោះទេ។
