(រដ្ឋបាលខេត្តកំពង់ធំ)៖ ថ្ងៃទី២១ ខែកញ្ញា ឆ្នាំ២០២៣ ឯកឧត្តម ងួន រតនៈ អភិបាលខេត្តកំពង់ធំ ដឹកនាំសហការី និងមន្ត្រីជំនាញ ធ្វើការត្រួតពិនិត្យ ស្ថានភាពជាក់ស្ដែងនៃការកើនឡើងទឹកជំនន់ក្នុងភូមិសាស្ត្រ ឃុំទ្រៀល និងឃុំបន្ទាយស្ទោង ស្រុកស្ទោង ខេត្តកំពង់ធំ។
ក្រោយពីទទួលបានសេចក្ដីការរាយការណ៍ពីអាជ្ញាធរស្រុក ស្ដីពីស្ថានភាពទឹកជំនន់មានការកើនឡើង ឯកឧត្តម ងួន រតនៈ សម្ដែងនូវការយកចិត្តទុកទាក់ ចុះត្រួតពិនិត្យដោយផ្ទាល់ ពីផលប៉ះពាល់នានា នឹងអនុវត្តនូវវិធានការដោះស្រាយបញ្ហាអោយមានប្រសិទ្ធភាពទាន់ពេលវេលា។
ស្ថានភាពបច្ចុប្បន្ន មានការជនលិចមួយចំនួននៅលើ ផ្ទៃដីដាំដុះដំណាំ ស្រែចម្ការ ផ្លូវថ្នល់ ហេដ្ឋារចនាសម្ព័ន្ធ ទីវត្តអារាម ផ្ទះសម្បែង និងនៅតាមបណ្តាលសាលារៀន តែមិនទាន់ប៉ះពាល់ខ្លាំងដល់ការសិក្សាររបស់សិក្សានុសិស្សនោះទោះទេ។
ឯកឧត្តម ងួន រតនៈ ជំរុញដល់អាជ្ញាធរស្រុក ត្រូវតាមដាននូវស្ថានភាពកម្ពស់ទឹក ស្រង់ទិន្នន័យខ្នងផ្ទះប្រជាពលរដ្ឋដែលរងការជន់លិច រាយការណ៍មកថ្នាក់លើ ដើម្បីរៀបចំជំនួយនិងអំណោយជូនដល់គ្រួសារដែលរងផលប៉ះពាល់។
ទន្ទឹមនឹងនោះ ឯកឧត្តម អភិបាលខេត្តកំពង់ធំ ក៏បានផ្តាំផ្ញើដល់បងប្អូនប្រជាពលរដ្ឋទាំងអស់ សូមប្រុងប្រយ័ត្នខ្ពស់ នៃការហក់ឡើងទឹកជំនន់នៅពេលនេះ ជាពិសេស ត្រូវមើលថែក្មេងៗឲ្យបានល្អ ដើម្បីចៀសផុតពីការលង់ទឹក ឆ្លងចរន្តអគ្គិសនី ក៏ដូចជាការការពារពីសត្វអសិរពិសនានាខាំឬទិច ព្រមទាំងជំរុញឲ្យអាជ្ញាធរ ស្រុក ឃុំ ភូមិ បន្តតាមដាននូវស្ថានភាពទឹកជំនន់បន្តទៀត ដើម្បីងាយស្រួលក្នុងការត្រៀមខ្លួនចុះជួយបងប្អូនប្រជាពលរដ្ឋឲ្យបានទាន់ពេលវេលា។
