(រដ្ឋបាលខេត្តកំពង់ធំ)៖ វេទិកាផ្គូរផ្គងរវាងអ្នកផលិត និងអ្នកទិញ ព្រមទាំងមានការតាំងបង្ហាញផលិតផលក្នុងស្រុក ធ្វើដំណើរដល់ ខេត្តកំពង់ធំហើយ ដោយបើកឱ្យចូលទស្សនាដោយសេរីចាប់ពីថ្ងៃទី៣ ដល់ទី៥ ខែតុលា ឆ្នាំ២០២៣ នៅសាលប្រជុំសាលាខេត្តកំពង់ធំ និងតាំងលក់ផលិតផល នៅសួនដងស្ទឹងសែន ខាងមុខសាលាខេត្តកំពង់ធំ។
ថ្លែងក្នុងពិធីបើកវេទិកាផ្គូរផ្គងរវាងអ្នកផលិត និងអ្នកទិញ ព្រមទាំងមានការតាំងបង្ហាញផលិតផលក្នុងស្រុកនេះ ក្រោមគម្រោងការទទួលបានទីផ្សារ សម្រាប់អ្នកផលិតក្នុងស្រុក និងសហគ្រាសធុនមីក្រូតូច និងមធ្យម ភូមិមួយផលិតផលមួយ នាព្រឹកថ្ងៃទី០៣ ខែតុលា ឆ្នាំ២០២៣ ឯកឧត្តម ជា វ៉ាន់ចាន់ អភិបាលរងខេត្តកំពង់ធំ តំណាងដ៏ខ្ពង់ខ្ពស់របស់ឯកឧត្តម ងួន រតនៈ បានមានប្រសាសន៍ថា វេទិកានេះ បានចូលរួមចំណែកក្នុងការអនុវត្តយុទ្ធសាស្ត្រជាតិ សម្រាប់ការកាត់បន្ថយភាពក្រីក្រ គឺការកៀរគរសក្តានុពលសេដ្ឋកិច្ចក្នុងស្រុក នៃផលិតផល និងសេវាកម្ម ដើម្បីលើកកម្ពស់ជីវភាពរស់នៅរបស់ប្រជាពលរដ្ឋ និងសហគមន៍ក្នុងមូលដ្ឋាន។
ភូមិមួយ ផលិតមួយ ធ្វើការជាមួយអ្នកផលិតក្នុងស្រុក ធុនមីក្រូតូច និងមធ្យម និងសមាគមធុរកិច្ច (MS MEs/SM Es, ACs) ប្រមាណ ២៥០នាក់ បានចូលរួម ដើម្បីបង្កើនគុណភាព និងទីផ្សារនៃផលិតផលក្នុងស្រុក។
ឯកឧត្តមបណ្ឌិត សួង ណយ អគ្គលេខាធិការរងគណៈកម្មាធិការជាតិ ជុំរុញចលនាភូមិមួយ ផលិតផលមួយ នៃទីស្តីការគណៈរដ្ឋមន្ត្រីបានថ្លែងថា គណៈកម្មាធិការជាតិ និងគណៈកម្មាធិការខេត្ត-រាជធានី ជំរុញចលនាភូមិមួយផលិតផលមួយ មានសេចក្តីរំភើបរីករាយ ក្នុងការដឹកនាំគំនិតផ្ដួចផ្ដើមឱ្យមានជំនួបរវាងអ្នកផលិតផល និងអ្នកទិញ ដ៏មានសារៈសំខាន់នេះ ដែលមានគោលបំណងកាត់បន្ថយ គម្លាតរវាងអ្នកផលិតក្នុងស្រុក និងអ្នកទិញ មានសក្តានុពលប្រកបដោយប្រសិទ្ធភាព និងសុច្ចរិតភាព។ តាមរយៈការបង្កើតយន្តការតភ្ជាប់បណ្ដាញប្រទាក់ក្រឡាគ្នាប្រកបដោយអត្ថន័យ ពីអ្នកផ្គត់ផ្គង់វត្ថុធាតុដើម អ្នកកែច្នៃវេចខ្ចប់ អ្នកប្រមូលផ្ដុំផលិតផល (ពីកសិដ្ឋានរហូតដល់តុបាយ ពីសិប្បកររហូតដល់អ្នកប្រើប្រាស់) ហើយពួកគាត់អាចសិក្សាស្វែងយល់ដកស្រង់បទពិសោធន៍ពីគ្នាទៅវិញទៅមក។
ឯកឧត្តមបណ្ឌិត សួង ណយ បានថ្លែងថា ការតាំងបង្ហាញផលិតផលនាឱកាសនេះ មានអ្នកចូលរួមដោយផ្ទាល់ប្រមាណ២៥០នាក់ រួមមានថ្នាក់ដឹកនាំ និងតំណាងមកពីមន្ទីរពាក់ព័ន្ធ សមាគមធុរៈកិច្ចសហគ្រាសខ្នាតតូច និងមធ្យម សហករណ៍កសិកម្ម ស្ថាប័នហិរញ្ញវត្ថុ អង្គការសង្គមស៊ីវិល និងក្រុមយុវជន។ គម្រោងដ៏មានសារៈសំខាន់នេះ ត្រូវបានផ្តួចផ្តើមឡើងដោយ គណៈកម្មាធិការជាតិជំរុញចលនាភូមិមួយ ផលិតផលមួយ និងអង្គការអុកស្វាម ក្នុងឆ្នាំ២០២២។ នាឆ្នាំ២០២៣នេះ ពួកយើងមានសេចក្តី សោមនស្សរីករាយ ដែលគម្រោងនេះទទួលបានដៃគូសហការថ្មី គឺសហគ្រិនខ្មែរ ដើម្បីសហការគាំទ្រ និងពង្រឹងលទ្ធភាពទទួលបានទីផ្សារសម្រាប់អ្នកផលិតក្នុងស្រុក និងពង្រីកការគាំទ្រនេះទៅកាន់បណ្តាខេត្ត-ក្រុងផ្សេងៗទៀត។
គួរបញ្ជាក់ផងដែរថា ឆ្នាំនេះគម្រោងរៀបចំវេទិកានេះនៅ ១៥ខេត្ត-ក្រុង រួមមាន៖ ខេត្តសៀមរាប កំពង់ឆ្នាំង បាត់ដំបង បន្ទាយមានជ័យ កំពង់ចាម ឧត្តរមានជ័យ កណ្តាល កំពត កោះកុង ពោធិ៍សាត់ កំពង់ធំ ត្បូងឃ្មុំ ស្ទឹងត្រែង កំពង់ស្ពឺ និងខេត្តស្វាយរៀង៕
