(រដ្ឋបាលខេត្តកំពង់ធំ)៖ នៅថ្ងៃទី១២ ខែតុលា ឆ្នាំ២០២៣ ឯកឧត្តម ងួន រតនៈ អភិបាលខេត្ត និងជាប្រធានគណៈកម្មាធិការគ្រប់គ្រងគ្រោះមហន្តរាយខេត្តកំពង់ធំ ព្រមទាំងប្រតិភូ អញ្ជើញចូលរួមក្នុងពិធីចែកអំណោយ ជូនដល់គ្រួសារទទួលរងផលប៉ះពាល់ ដោយគ្រោះទឹកជំនន់ និងមានជីវភាពខ្វះខាត ក្នុងក្រុងស្ទឹងសែន និងស្រុកស្ទោង ចំនួន ៥០០គ្រួសារ ក្នុងនោះនៅក្រុងស្ទឹងសែន ចំនួន ៣០០គ្រួសារ និងស្រុកស្ទោង ចំនួន ២០០គ្រួសារ ។
នៅក្នុងពិធីនោះដែរ ឯកត្តម ងួន រតនៈ ថ្លែងថា សូមឱ្យក្រុមការងារ ក្រុង ស្រុក ដែលមានការិយាល័យកសិកម្មធនធានធម្មជាតិ និងបរិស្ថាន ជាសេនាធិការ នឹងចុះវាយតម្លៃផលខូចខាតដំណាំស្រូវ និងដំណាំរួមផ្សំ ជាមួយរដ្ឋបាលឃុំ សង្កាត់ និងភូមិ ដើម្បីស្រង់យកទិន្នន័យខូចខាត ស្រូវ និងដំណាំរួមផ្សំ ឱ្យបានច្បាស់លាស់ ដើម្បីឲ្យក្រុងស្រុកមានមូលដ្ឋានក្នុងការរៀបចំសំណើស្នើសុំ ស្បៀងសង្គ្រោះបឋម និងពូជស្រូវសម្រាប់ស្ដារឡើងវិញ នៅរដូវទឹកសម្រកខាងមុខនេះ។
ឯកឧត្តមអភិបាលខេត្ត ណែនាំដល់ពលរដ្ឋទាំងអស់ នារដូវទឹកជំនន់នេះ មេត្តាបន្ថែមការប្រុងប្រយ័ត្ន ជាពិសេសគឺកុមារតូចៗ និងមនុស្សចាស់ ត្រូវថែរក្សាសុខភាពជាប្រចាំ មានអនាម័យក្នុងការរស់នៅបីប្រការគឺ(ហូបស្អាត ផឹកស្អាតនិងរស់នៅស្អាត) ចៀសសវាងពីការឆ្លងជំងឺផ្សេងៗ និងប្រុងប្រយ័ត្នពីសត្វអសេរពិលផ្សេងៗទិចឬខាំ កើតឡើងជាយថាហេតុ។
សូមបញ្ជាក់ផងដែរថា អំណោយដែលចែកជូននៅពេលនេះ ក្នុងមួយគ្រួសារទទួលបាន៖ អង្ករ ០១បេ មី ០១កេស ទឹកត្រី ០១យួរ ទឹកស៊ីអ៊ីវ ០១យួរ ត្រីខ ១យួរ និង ទឹកបរិសុទ្ធ ០១កេស ដែលជាអំណោយសម្ដេចបវធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងលោកជំទាវ ពេជ្រ ចន្ទមុន្នី។
