(រដ្ឋបាលខេត្តកំពង់ធំ)៖ នាព្រឹកថ្ងៃទី១៩ ខែតុលា ឆ្នាំ២០២៣ ឯកឧត្តម ងួន រតនៈ អភិបាលខេត្តកំពង់ធំ និងលោកជំទាវ សុខ ចន្ទធូ អញ្ជើញជាអធិបតីភាពក្នុង ពិធីវេទិកាផ្សព្វផ្សាយ និងពិគ្រោះយោបល់ របស់ក្រុមប្រឹក្សាខេត្តកំពង់ធំ អាណត្តិទី៣ ឆ្នាំ២០២៣ នៅក្រុងស្ទឹងសែន។
គោលបំណងនៃវេទិកានេះ គឺអនុវត្តតាមគោលនយោបាយរបស់រាជរដ្ឋាភិបាលកម្ពុជា ដែលតម្រូវឱ្យមានការកែលម្អប្រព័ន្ធអភិបាលកិច្ចល្អនៅថ្នាក់រដ្ឋបាលនានា ដើម្បីជំរុញលទ្ធិប្រជាធិបតេយ្យនៅថ្នាក់មូលដ្ឋាន និងជំរុញកិច្ចអភិវឌ្ឍន៍សេដ្ឋកិច្ច សង្គមកិច្ចក្នុងការធានាការរួមចំណែកនៃការកាត់បន្ថយភាពក្រីក្រនៅទូទាំងប្រទេស និងដើម្បីឱ្យក្រុមប្រឹក្សាខេត្តជម្រាបជូនក្រុមប្រឹក្សាក្រុង ស្រុក ឃុំ សង្កាត់ សហគមន៍ ប្រជាពលរដ្ឋ និងអ្នកពាក់ព័ន្ធនានា អំពីសកម្មភាពរបស់ក្រុមប្រឹក្សាខេត្តក្នុងរយៈពេលមួយឆ្នាំ ចំពោះការឆ្លើយយតបនូវសំណើ សំណូមពរនានា របស់ក្រុមប្រឹក្សាក្រុង ស្រុក ឃុំ សង្កាត់ ពិភាក្សា បកស្រាយអំពីបញ្ហានានាដល់អ្នកចូលរួម និងក៏ដូចជាស្វែងរកដំណោះស្រាយ និងសំណូមពររបស់ប្រជាពលរដ្ឋ ។
ក្នុងឱកាសនោះដែរ អង្គវេទិកាទាំងមូលក៏បានផ្ដល់ឱកាសដល់ប្រជាពលរដ្ឋ និងអ្នកចូលរួមទាំងអស់អនុញ្ញាតធ្វើការលើកជាសំណួរ សំណូមពរ និងធ្វើការបង្ហាញអំពីតម្រូវការ ក៏ដូចជាបញ្ហានានាដែលមាននៅក្នុងសហគមន៍របស់ខ្លួន ជូនដល់គណៈអធិបតីដើម្បីធ្វើការបកស្រាយ ក៏ដូចជាដោះស្រាយជូនប្រជាពលរដ្ឋដែលកំពុងជួបតែជួបប្រទះបញ្ហាផ្សេងៗដែលមាននៅក្នុងមូលដ្ឋានរបស់ខ្លួន ។
គួរបញ្ជាក់ផងដែរថា រដ្ឋបាលខេត្តកំពង់ធំបានរៀបចំ វេទិកាផ្សព្វផ្សាយ និងពិគ្រោះយោបល់ របស់ក្រុមប្រឹក្សាខេត្តអាណត្តិទី៣ ឆ្នាំ២០២៣ នៅទូទាំង៩ក្រុងស្រុក ដោយដំណើរការរយៈពេល៣ថ្ងៃ និងមានការចូលរួមលើកឡើងនូវ សំណួរ សំណើ សំណូមពរនានា យ៉ាងច្រើនពីសំណាក់ប្រជាពលរដ្ឋ។ ថ្នាក់ដឹកនាំ អាជ្ញាធរ និងស្ថាប័នពាក់ព័ន្ធនានា បានទទួលយកនូវរាល់សំណើរ និងសំណូមពរ និងធ្វើការបកស្រាយ ឆ្លើយបំភ្លឺ ទៅកាន់ប្រជាពលរដ្ឋវិញ យ៉ាងក្បោះក្បាយ និងមានប្រសិទ្ធភាពផងដែរ។