(រដ្ឋបាលខេត្តកំពង់ធំ)៖ នារសៀលថ្ងៃទី២០ ខែតុលា ឆ្នាំ២០២៣ ប្រជាពលរដ្ឋដែលរងគ្រោះដោយសារទឹកជំនន់ ចំនួន ៣០០គ្រួសារ ទទួលអំណោយជាស្បៀងអាហារ ពីស្បៀងបម្រុងកម្ពុជា តាមរយៈរដ្ឋបាលខេត្តកំពង់ធំ ។ ការទទួលស្បៀងនេះនៅក្នុងវត្តស្រយ៉ូវ សង្កាត់ស្រយ៉ូវ ក្រុងស្ទឹងសែន ចុះចែកផ្ទាល់ដោយឯកឧត្តម ងួន រតនៈ អភិបាលខេត្តកំពង់ធំ លោក ពេញ កែម អភិបាលក្រុងស្ទឹងសែន និងមន្ត្រីជំនាញពាក់ព័ន្ធជាច្រើនរូបផងដែរ ។
ឯកឧត្តម ងួន រតនៈ អភិបាលខេត្តកំពង់ធំ បានឱ្យដឹងថា ស្បៀងទាំងអស់នេះ គឺជាការយល់ចិត្តទុកដាក់ ទុកបម្រុង រួចស្រេចដើម្បីជួយសង្គ្រោះទៅដល់ប្រជាពលរដ្ឋក្នុងខេត្តកំពង់ធំ ឱ្យតែមានគ្រោះមហន្តរាយ គ្រោះទឹកជំនន់ គឺរាជរដ្ឋាភិបាលកម្ពុជា ដឹកនាំដោយសម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា ។
ឯកឧត្តម អភិបាលខេត្តកំពង់ធំបានបន្តថា នេះសបញ្ជាក់ឱ្យឃើញពីកិច្ចខំប្រឹងប្រែង ដោះស្រាយនូវក្តីកង្វល់ ទុកលំបាក និងបញ្ហាប្រឈម របស់បងប្អូន ប្រជាពលរដ្ឋក្នុងក្រុងស្ទឹងសែន និងការយកចិត្តទុកដាក់ចំពោះជីវភាពរស់នៅ របស់បងប្អូនប្រជាពលរដ្ឋក្នុងក្រុងស្ទឹងសែន ។
លោក ពេញ កែម អភិបាលក្រុងស្ទឹងសែនបានឱ្យដឹងថា ភាពទឹកជំនន់ ប្រជាពលរដ្ឋដែលរងផលប៉ះពាល់ ក្នុងក្រុងស្ទឹងសែន មានគ្រួសារសរុបចំនួន ១៣,៦៤៥គ្រួសារ ប្រជាពលរដ្ឋ ដែលក្រីក្រមានប័ណ្ណសមធម៍សរុប ២,៧១៣គ្រួសារ ក្នុងនោះ ៖ប្រភេទក្រ១ ចំនួន ៩៦១គ្រួសារ និងក្រ២ ចំនួន ១,៧៥២គ្រួសារ ( មកដល់ពេលនេះសង្កាត់ស្រយ៉ូវ គ្រួសារក្រីក្រមានប័ណ្ណសមធម៌ សរុប ៦១៨គ្រួសារ ក្នុងនោះ៖ ប្រភេទក្រ១ ចំនួន ២៤២គ្រួសារ និងក្រ២ចំនួន ៣៧៦ គ្រួសារ និងគ្រួសារងាយរងហានិភ័យចំនួន ៦៦១គ្រួសារ)។ លោកបានបន្ថែមថាស្ថានភាពទឹកជំនន់ ដោយពេលកន្លងស្ថានភាពទឹកស្ទឹងសែនបន្តឡើងដល់កំពស់ ១៣,៧៧ម៉ែត្រ (លើសប្រកាសអាសន្ត ០,២៧ ម៉ែត្រ) ធ្វើអោយប្រជាពលរដ្ឋក្នុងសង្កាត់ស្រយ៉ូវ ក្រុងស្ទឹងសែន រងផលប៉ះពាល់ដោយទឹកជំនន់ជាក់ស្តែងចំនួន៩ភូមិ ស្មើ ៣០១គ្រួសារ។ ប៉ះពាល់ដំណាំស្រូវ ចំនួន ១,១៦៨ហិតា ប៉ះពាល់ផ្លូវក្រាលគ្រួសក្រហម ចំនួន ៥,៤៦០ម៉ែត្រ -ប៉ះពាល់ផ្លូវដីស ចំនួន២២០ម៉ែត្រ។លោកបន្ថែមថា ការឆ្លើយតប ប្រជាពលរដ្ឋសង្កាត់ស្រយ៉ូវ បានទទួលអំណោយរបស់ គណៈកម្មាធិការគ្រប់គ្រងប្រព័ន្ធស្បៀងបំរុងកម្ពុជា (បសបក) ចំនួន ៧០គ្រួសារ នៅសាលាក្រុងស្ទឹងសែន កាលពីថ្ងៃទី១០ ខែតុលា ឆ្នាំ២០២៣ កន្លងទៅ៕
