(រដ្ឋបាលខេត្តកំពង់ធំ)៖ រសៀល ថ្ងៃទី២៨ ខែតុលា ឆ្នាំ២០២៣នេះ រដ្ឋបាលខេត្តកំពង់ធំ បានប្រារព្ធពិធីប្រណាំងទូក ង ដណ្តើមយកជ័យលាភីថ្នាក់ខេត្ត ដើម្បីចូលរួមប្រណាំងទូកថ្នាក់ជាតិ នៃពិធីបុណ្យអុំទូក អកអំបុក បណ្តែតប្រទីប សំពះព្រះខែ នាពេលខាងមុខនេះ ដែលពិធីប្រពៃណីមួយនេះ បានដំណើរការទៅក្រោមអធិបតីភាព ឯកឧត្តមបណ្ឌិត ជា ចាន់តូ អគ្គទេសាភិបាលកិត្តិយសធនាគារជាតិ និងជាប្រធានក្រុមការងារចុះមូលដ្ឋានខេត្តកំពង់ធំ ។ដោយមានការចូលរួមពីសមាជិកព្រឹទ្ធសភារដ្ឋសភា រាជរដ្ឋាភិបាល គណៈអភិបាលខេត្ត ថ្នាក់ដឹកនាំ មន្ទីរ អង្គភាព ស្ថាប័ន នានាជុំវិញខេត្ត ប្រជាពលរដ្ឋ យ៉ាងច្រើនកុះករ។
ឯកឧត្តម ងួន រតនៈ បានស្វាគមន៍ គណៈអធិបតី និងលើកទឹកចិត្ត ដល់ក្រុមកីឡាទូកង ទាំងអស់ឲ្យខិតខំប្រឹងប្រែង ឲ្យអស់ពីសមត្ថភាព ក្នុងពិធីប្រណាំងទូកនេះ ដណ្តើមយកជ័យលាភី ថ្នាក់ខេត្ត និងឈានទៅចូលរួមប្រណាំងទូកថ្នាក់ជាតិ នៃពិធីបុណ្យអុំទូក អកអំបុក បណ្តែតប្រទីប សំពះព្រះខែ នាពេលខាងមុខនេះ។
ឯកឧត្តម ងួន រតនៈ សូមថ្លែងអំណរគុណ ចំពោះ សប្បុរសជនទាំងអស់ ដែលបានឧបត្ថម្ភគាំទ្រ ដល់ពិធីប្រណាំងទូក ង របស់ខេត្ត ។
ឯកឧត្តមបណ្ឌិត ជា ចាន់តូ បានលើកឡើងថា ការរៀបចំពិធីអុំទូករបស់ខេត្ត គឺជាការចូលរួមចំណែកក្នុងការថែរក្សាទំនៀមទម្លាប់ប្រពៃណីដ៏ ល្អផូរផង់របស់ជាតិ ហើយក៏ជាទម្លាប់របស់ខេត្តកំពង់ធំដែលតែងតែរៀបចំឡើងជារៀងរាល់ឆ្នាំកន្លងមកផងដែរ។ កម្មវិធីដ៏ឱឡារិកនាថ្ងៃនេះ ផ្ដល់ឱកាសជូនបងប្អូនប្រជាពលរដ្ឋបានកំសាន្តសប្បាយ ស្របពេលដែលប្រទេសកម្ពុជាកំពុងតែមានសុខសន្តិភាព ស្ថិរភាពនយោបាយពេញលេញ ក្រោមការដឹកនាំរបស់ស្ថាបនិកសន្តិភាព សម្តេចអគ្គមហាសេនាបតីតេជោ ហ៊ុន សែន និងការដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីដែលតែងតែទទួលបានការទុកចិត្ត និងគាំទ្រយ៉ាងច្រើនលើសលប់ពីប្រជាពលរដ្ឋ។
ឯកឧត្តមបណ្ឌិតបានបន្តថា អត្ថន័យសំខាន់នៃពិធីបុណ្យអុំទូកថ្ងៃនេះ មិនមែនជាការចង់ឈ្នះចង់ចាញ់យករង្វាន់អ្វីនោះទេ តែជាការចូលរួមថែរក្សា វប្បធម៌ប្រពៃណីជាតិ ដ៏ល្អរបស់យើងឲ្យគង់វង្សស្ថិតស្ថេរជានិច្ចនិរន្តរ៍តរៀងទៅ។ ដូចដែលយើងទាំង អស់គ្នាបានដឹងមកហើយ ពិធីបុណ្យអុំទូក បណ្តែតប្រទីប សំពះព្រះខែ និងអកអំបុក ជាប្រពៃណ៏ ទំនៀមទម្លាប់ខ្មែរ ដែលជាមរតកវប្បធម៌ដូនតាបានបន្សល់ទុកតាំងពីសម័យបុរាណយូរលង់ណាស់មកហើយ។ សព្វថ្ងៃពិធីបុណ្យដ៏មានសារៈសំខាន់នេះ ត្រូវបានពលរដ្ឋប្រតិបត្តិបន្តរៀងរាល់ឆ្នាំ និងចាត់ទុកថាជាបុណ្យប្រពៃណីវប្បធម៌ជាតិដ៏ធំមួយ ក្នុងចំណោមពិធីបុណ្យសំខាន់ៗជាច្រើនទៀត។
ឯកឧត្តមបណ្ឌិតបានបញ្ជាក់ថា ការរៀបចំពិធីបុណ្យអុំទូក ក៏ជាការឧទ្ទិស និងសម្ដែងនូវការដឹងគុណដល់ទន្លេមេគង្គ និងទន្លេសាបដែលបានផ្ដល់ជីជាតិយ៉ាងសំខាន់បម្រើដល់វិស័យកសិកម្មផងដែរ ។ ហើយពិធីប្រណាំងចាប់ផ្តើម ក្រោមបរិយាសសប្បាយរីករាយនិងអាកាសធាតុ អំណោយផលល្អពីព្រះអាទិត្យ ចែងចាំងបង្កឲ្យក្រុមកីឡាករអុំទូក តាមដង ស្ទឹងសែន បញ្ចេញនូវសមត្ថភាព បច្ចេកទេស ប្រគួត ប្រជែង ជូនប្រជាពលរដ្ឋគាំទ្រ ទស្សនាកំសាន្ត៕
