(រដ្ឋបាលខេត្តកំពង់ធំ)៖ ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម និងលោកជំទាវ Zhong Jie ទីប្រឹក្សាសេដ្ឋកិច្ច និងពាណិជ្ជកម្ម នៃស្ថានទូតចិនប្រចាំនៅកម្ពុជា អមដំណោយដោយឯកឧត្តម ងួន រតនៈ អភិបាលខេត្តកំពង់ធំ អញ្ជើញចូលរួមក្នុងពិធីបើកការដ្ឋានផ្លូវការ និងបញ្ជាគ្រឿងចក្រនៃគម្រោងអភិវឌ្ឍន៍អាងទឹកដងកាំបិត ក្នុងភូមិស្រែខ្សាច់ ឃុំដងកាំបិត ស្រុកសណ្តាន់ ខេត្តកំពង់ធំ នាព្រឹកថ្ងៃទី០១ ខែកុម្ភ: ឆ្នាំ២០២៤នេះ។
នៅក្នុងពិធីនោះដែរ ឯកឧត្តម ងួន រតនៈ អភិបាលខេត្តកំពង់ធំ បានឡើងរាយការណ៍សង្ខេបអំពីស្ថានភាពភូមិសាស្ត្រក្នុងខេត្តកំពង់ធំជូនអង្គពិធី ព្រមទាំងមានប្រសាសន៍លើកឡើងថា ការបើកការដ្ឋានសាងសង់អាងទឹកដងកាំបិតនាពេលនេះ នឹងក្លាយទៅជាចំណែកដ៏សំខាន់ក្នុងការជំរុញសក្តានុពលវិស័យកសិកម្មក្នុងខេត្តកំពង់ធំ និងខេត្តពាក់ព័ន្ធឲ្យកាន់តែរីកចម្រើន ជាពិសេស គឺការចូលរួមជំរុញការអនុវត្តគោលនយោបាយ ជំរុញផលិតផលស្រូវ និងការនាំចេញអង្ករ របស់រាជរដ្ឋាភិបាល ឲ្យកាន់តែមានប្រសិទ្ធភាព។ លើសពីនេះ ក្រោយពីសំណង់នេះត្រូវបានបញ្ចប់ វាមិនត្រឹមតែជាកន្លែងសម្រាប់ស្តុកទុកទឹក ប្រើប្រាស់នៅរដូវប្រាំងប៉ុណ្ណោះទេ វាថែមទាំងដើរតួយ៉ាងសំខាន់ក្នុងការកាត់ បន្ថយសន្ទុះនៃទឹកជំនន់នៅរដូវវស្សាទៀតផង។ ម្យ៉ាងវិញទៀត សំណង់អាងទឹកនេះ អាចនឹងក្លាយទៅជាតំបន់ទេសចរណ៍លំហែកម្សាន្ត ដែលជាប្រភពចំណូលដល់បង ប្អូនប្រជាពលរដ្ឋនៅមូលដ្ឋានផងដែរ។
ជាមួយគ្នានោះដែរ ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម ថ្លែងថា ខេត្តកំពង់ធំ ទទួលបានសមិទ្ធិផលថ្មីក្នុងវិស័យធនធានទឹក ក្រោមគម្រោងហិរញ្ញប្បទានសម្បទាន និងគម្រោងជំនួយកិច្ចសហការបច្ចេកទេសរបស់ប្រជាមានិតចិន តាមរយៈក្រសួងសេដ្ឋកិច្ច និងហិរញ្ញវត្ថុ ដែលជាសំណង់នៃការទូត រវាងព្រះរាជាណាចក្រកម្ពុជា និងសាធារណរដ្ឋប្រជាមានិតចិន។ ហើយការសាងសង់អភិវឌ្ឍន៍អាងទឹកដងកាំបិតនៅពេលនេះ បានបង្ហាញពីការយកចិត្តទុកដាក់របស់រាជរដ្ឋាភិបាល ក្រោមការដឹកនាំប្រកបដោយភាពឈ្លាសវៃរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ក្នុងការគ្រប់គ្រងទឹក ដើម្បីធានាផ្គត់ផ្គង់ទឹកសម្រាប់ស្រោចស្រពផ្ទៃដីកសិកម្ម ព្រមទាំងធានាទឹកសម្រាប់ប្រើប្រាស់ក្នុងជីវភាពរស់នៅប្រចាំថ្ងៃ និងក្នុងផ្នែកឧស្សាហកម្ម ដែលជាផ្នែកមួយជួយលើកស្ទួយដល់គោលនយោបាយជាតិ ស្ដីពីសន្តិសុខស្បៀងប្រកបដោយប្រសិទ្ធភាព។ ឯកឧត្តមរដ្ឋមន្ត្រីបន្ថែមទៀតថា គម្រោងអភិវឌ្ឍន៍អាងទឹកដងកាំបិត មានសំណង់សំខាន់សំខាន់ដូចជា ទំនប់ស្ទាក់ទឹក សំណង់បង្ហៀរទឹក ទំនប់បេតុង និងផ្លូវចូលទីតាំងទំនប់ ដែលបានផ្តល់អត្ថប្រយោជន៍ដល់ស្រុកចំនួន៦ ក្នុងខេត្តកំពង់ធំ រួមមាន ស្រុកបារាយណ៍ សណ្ដាន់ សន្ទុក ស្ទោង កំពង់ស្វាយ និងស្រុកប្រាសាទសំបូរ រួមទាំងស្រុករវាង និងស្រុកសែនជ័យ ក្នុងខេត្តព្រះវិហារថែមទៀតផង។
ឯកឧត្តម រដ្ឋមន្ត្រី បន្ថែមទៀតថា ទន្ទឹមនឹងកត្តាវិជ្ជមានខាងលើ ផលប៉ះពាល់មួយចំនួនតូចអាចនឹងកើតមានផងដែរ ដែលទាមទារការយោគយល់ និងអធ្យាស្រ័យពីបងប្អូនប្រជាពលរដ្ឋដែលរស់នៅជុំវិញតំបន់ការដ្ឋានសំណង់ រួមជាមួយប្រជាពលរដ្ឋដែលរស់នៅក្នុងឃុំមួយចំនួនក្នុងស្រុកសណ្ដាន់នេះផ្ទាល់ និងឃុំមួយចំនួននៃស្រុករវៀង និងស្រុកសែនជ័យ ខេត្តព្រះវិហារ ។
