(រដ្ឋបាលខេត្តកំពង់ធំ)៖ នាព្រឹកថ្ងៃទី២១ ខែមិថុនា ឆ្នាំ២០២២ គណៈកម្មាធិការសមាគមអតីតយុទ្ធជនកម្ពុជា ខេត្តកំពង់ធំ រៀបចំប្រារព្ធពិធីខួបលើកទី១៥ឆ្នាំ ទិវាអតីតយុទ្ធជនកម្ពុជា ក្រោមអធិបតីភាព ឯកឧត្តម ងួន រតនៈ អភិបាលខេត្ត និងជាប្រធានកិត្តិយសនៃគណៈកម្មាធិការសមាគមអតីតយុទ្ធជនកម្ពុជាខេត្តកំពង់ធំ នៅលើភូមិឋានរបស់អតីតយុទ្ធជននៅដីសម្បទានសង្គមកិច្ច ស្ថិតនៅភូមិដងក្តារ ឃុំក្រយា ស្រុកសន្ទុក ខេត្តកំពង់ធំ ដោយមានការចូលរួមពីបងប្អូនអតីតយុទ្ធជនប្រមាណចំនួន ១៥០គ្រួសារ។
ជាមួយគ្នានោះដែរឯកឧត្តម ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករង ប្រធានសមាគមអតីតយុទ្ធជនកម្ពុជាខេត្តកំពង់ធំ បានឡើងអានសារលិខិតរបស់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា និងជាប្រធានសមាគមអតីតយុទ្ធជនកម្ពុជា ក្នុងឱកាសខួបលើកទី១៥ឆ្នាំ ទិវាអតីតយុទ្ធជនកម្ពុជា២១មិថុនា ឆ្នាំ ២០២២ ផ្ញើជូនបងប្អូនអតីតយុទ្ធជន និងជនរួមជាតិទាំងអស់ជាទីស្រឡាញ់រាប់អាន ព្រមទាំងសូមគោរពថ្លែងអំណរគុណដ៏ជ្រាលជ្រៅជាទីបំផុត ចំពោះសម្តេចតេជោ ហ៊ុន សែន និងសម្តេចកិត្តិព្រឹទ្ឋបណ្ឌិត ដែលបានផ្តល់ដីសម្បទទាន សង្គមកិច្ចក្នុងមួយគ្រួសារ មួយហិកតាកន្លះ និងផ្ទះថ្មីមួយខ្នង ជូនដល់បងប្អូនអតីតយុទ្ធជន ចំនួន ១៥០គ្រួសារ ដែលគ្មានដីគ្មានផ្ទះរស់នៅសមរម្យ នៅតាមមូលដ្ឋាននានា ក្នុងខេត្តកំពង់ធំ បានមករស់នៅទីនេះ។
ក្នុងឱកាសនេះ ឯកឧត្តម ងួន រតនៈ ប្រធានកិត្តិយសសមាគមអតីតយុទ្ធជនខេត្តកំពង់ធំ លើកឡើងថា គុណបំណាច់របស់អតីតយុទ្ធជនកម្ពុជា ដែលលះបង់សាច់ស្រស់ ឈាមស្រស់ដណ្តើមយកសុខសន្និភាព បូរណភាពទឹកដី ពិតជាមានគុណបំណាច់ដ៏ ធំធេង មិនអាចបំភ្លេចបាន។ អតីតយុទ្ធជនទាំងអស់នេះដែលបានរួមរស់ជាសម្តេចតេជោ ក្នុងបុព្វហេតុរំដោះ ជាតិ។ បច្ចុប្បន្នប្រមុខរាជរដ្ឋាភិបាលកម្ពុជា បាន និងកំពុងយកចិត្តទុកដាក់យ៉ាងខ្លាំងតារយៈបង្កើតឲ្យមាន សមាគមអតីតយុទ្ធជន ដែលមានការផ្តល់ជូននូវការជួយឧបត្ថម្ភទាំងសម្ភារៈ សំនៅដ្ឋាន និងដីកសិកម្ម សម្រាប់បង្កបង្កើនផលផងដែរ។ ទន្ទឹមនេះ ក៏មានក្រុមសម្ព័ន្ធមិត្តភាពរបស់មន្ទីរអង្គភាព និងសប្បុរសជន ជួយឧបត្ថម្ភទាំងសម្ភារ និងថវិកា។ ជាក់ស្តែងនៅថ្ងៃនេះ ក៏មានក្រុមហាត់ប្រាណមិត្តភាព ជួយឧបត្តម្ភស្បៀង អាហារ ចំនួន១៥០គ្រួសារ ដែលមួយគ្រួសារទទួលបានអង្ក២០គីឡូក្រាម មី ត្រីខ១យួរ ទឹកសេអ៊ីវ១យួរ ទឹកត្រី១យួរ និងប៊ីចេង ១គីឡូក្រាម។ រួមជាមួយគ្នានេះ ក្នុងនាមសមាគមន៍អតីតយុទ្ធកម្ពុជា បានសហការគ្នាផ្តល់ថវិកា ជួយទ្រទ្រង់ គ្រួសារអតីតយុទ្ធបន្ថែមក្នុងមួយគ្រួសារ ចំនួន៤ម៉ឺនរៀល។
លោកស្រី លី ហឿម តំណាងក្រុមហាត់ប្រាណមិត្តភាព សម្តែងសេចក្តីសោមនស្សរីករាយ ពេញចិត្ត និងដឹងគុណនូវការលះបង់របស់អតីតយុទ្ធជន ហើយសម្ភារទាំងអស់នេះ គឺជាការមូលមតិសហការគ្នា ជួយដោះស្រាយការលំបាកមួយគ្នាផងដែរ។