(រដ្ឋបាលខេត្តកំពង់ធំ): នារសៀលថ្ងៃទី១១ ខែកក្កដា ឆ្នាំ២០២២ រដ្ឋបាលខេត្តកំពង់ធំ បើកកិច្ចប្រជុំគណៈបញ្ជាការឯកភាពរដ្ឋបាលខេត្តក្រោមអធិបតីភាព ឯកឧត្តមងួន រតនៈ អភិបាលខេត្តកំពង់ធំ និងជាប្រធានគណៈបញ្ជាការឯកភាពរដ្ឋបាលខេត្ត នៅសាលប្រជុំសាលាខេត្តកំពង់ធំ ។
នៅក្នុងកិច្ចប្រជុំនេះ ផ្តោតទៅលើវិធានការ និងផែនការ ចំនួន ៧ចំណុច មានដូចជា៖
១- ជំរុញដល់ប្រធានមន្ទីរអង្គភាព និងអាជ្ញាធរមូលដ្ឋាន បង្កើនការយកចិត្តទុកដាក់ក្នុងការអប់រំ និងណែនាំដល់គ្រឹះស្ថានសិក្សា ក៏ដូចជាប្រជាពលរដ្ឋឱ្យអនុវត្តឱ្យបានខ្ជាប់ខ្ជួននូវវិធានការ “៣កុំ ៣ការពារ” ឱ្យបានជាប់ជាប្រចាំ និងជំរុញដល់ប្រជាពលរដ្ឋដែលពុំទាន់បានចាក់ វ៉ាកសាំងកូវីដ-១៩ដូសជំរុញ ( ដូសទី៣ ទី៤ និងទី៥) ឱ្យទៅចាក់វ៉ាក់សាំងឱ្យបានគ្រប់ៗគ្នា
២- ជំរុញដល់ប្រធានអង្គភាពស្ថាប័នពាក់ព័ន្ធ បន្តខិតខំដោះស្រាយទំនាស់នៅក្នុងមូលដ្ឋានរបស់ខ្លួន ដូចភ្លៀងរលឹម
៣- ជំរុញការផលិតអត្តញាណប័ណ្ណជូនប្រជាពលរដ្ឋអោយបានឆាប់រហ័ស
៤- កំណត់មុខសញ្ញាក្មេងទំនើង ដើម្បីចាត់វិធានការធ្វើការអប់រំ
៥- ខិតខំបន្តទប់ស្កាត់ និងបង្រ្កាបល្បែងស៊ីសងនៅក្នុងមូលដ្ឋានឱ្យបានជាប់ជាប្រចាំដូចភ្លៀងរលឹម
៦- ការរៀបចំវេទិកាសាធារណៈតាមបណ្ដាក្រុងស្រុក
៧- ពិនិត្យលទ្ធភាពនៅក្នុងការកាត់ឆ្វៀលដីតំបន់៣ ជូនប្រជាពលរដ្ឋ ស្របតាមអនុសាសន៍របស់សម្តេចតេជោ នៅតាមបណ្ដាស្រុកជាប់ពាក់ព័ន្ធ ។