(រដ្ឋបាលខេត្តកំពង់ធំ): ឯកឧត្តម ងួន រតនៈ អភិបាលខេត្តកំពង់ធំ និងសហការី អញ្ជើញចុះជួបសំណេះសំណាល និងផ្សព្វផ្សាយអនុសាសន៍សម្តេចស្តីពីការកែសម្រួលការបោះបង្គោលព្រំប្រទល់ដី និងកាត់ឆ្វៀលដីនៅក្នុងតំបន់បឹងទន្លេសាបជូនប្រជាពលរដ្ឋដែលបានអាស្រ័យផលជាក់ស្តែងយូរឆ្នាំ ស្ថិតនៅឃុំកំពង់គោ ស្រុកកំពង់ស្វាយ ខេត្តកំពង់ធំ នាព្រឹកថ្ងៃទី១២ ខែកក្កដា ឆ្នាំ២០២២។
នៅក្នុងឱកាសនោះឯកឧត្តម ងួន រតនៈ បានជំរុញដល់មន្ទីរអង្គភាពជំនាញ និងអាជ្ញាធរពាក់ព័ន្ធ ពន្លឿនការអនុវត្តការងារការកាត់ឆ្វៀលដីជូនប្រជាពលរដ្ឋដែលបានរស់នៅអាស្រ័យផលយូរឆ្នាំជាក់ស្ដែងនៅតាមបណ្ដាឃុំ ដែលពាក់ព័ន្ធនឹងដីក្នុងតំបន់បឹងទន្លេសាបស្របតាមបទបញ្ជារបស់សម្ដេចតេជោហ៊ុនសែន ដើម្បីឲ្យពួកគាត់អាចទទួលបានដីកម្មសិទ្ធិអាស្រ័យផលដោយស្របច្បាប់។
ឯកឧត្តមអភិបាលខេត្តកំពង់ធំ បានបញ្ជាក់ទៀតថា ចំពោះដីក្នុងតំបន់បឹងទន្លេសាបដែលប្រជាពលរដ្ឋឬ ជនខិលខូចបានកាប់ទន្ទ្រានខុសច្បាប់រយៈពេលខ្លី ត្រឹមពីរ ឬបីឆ្នាំ អាជ្ញាធរនឹងត្រូវដកហូតយកមកវិញ ដូច្នេះសូមអំពាវនាវដល់ប្រជាពលរដ្ឋបញ្ឈប់ការកាប់ទន្ទ្រានយកដីព្រៃលិចទឹកជាបន្តទៀត ដែលទង្វើនេះបានបង្កឲ្យមានផលប៉ះពាល់ដល់ប្រព័ន្ធជីវៈចម្រុះនៅក្នុងបឹងទន្លេសាប ហើយក៏ជាអំពើខុសច្បាប់ផងដែរ។
ជាចុងក្រោយ ឯកឧត្តម ងួន រតនៈ បានសំណូមពរដល់បងប្អូនប្រជាពលរដ្ឋទាំងអស់អញ្ជើញទៅចាក់វ៉ាក់សាំង ដូសជំរុញ ឲ្យបានគ្រប់ៗគ្នានៅតាមមណ្ឌលសុខភាពនៅជិតបំផុត ដើម្បីការពារជំងឺកូវីដ-១៩ កុំឲ្យមានការីករាលដល់សហគមន៍។