(រដ្ឋបាលខេត្តកំពង់ធំ) នាព្រឹកថ្ងៃទី២៤ ខែវិច្ឆិកា ឆ្នាំ២០២២ រដ្ឋបាលខេត្តកំពង់ធំ រៀបចំវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្ត នៅក្រុងស្ទឹងសែន ក្រោមអធិបតីភាព ឯកឧត្តម ដៀប ពីរី សមាជិកក្រុមប្រឹក្សាខេត្ត និងឯកឧត្តម ងួន រតនៈ អភិបាលខេត្តកំពង់ធំ នៅសាលាក្រុងស្ទឹងសែន។
ឯកឧត្តម ងួន រតនៈ ថ្លែងថា វេទិកានាឱកាសនេះ ពិតជាបានបំពេញនូវតួនាទីបានល្អ ក្នុងគោលបំណងផ្សព្វផ្សាយផ្តល់ព័ត៌មានជូនប្រជាពលរដ្ឋនូវសមិទ្ធផលនានា ដែលយើងបានអនុវត្តការងារកន្លងមក ក្នុងកម្រិតក្រុង កម្រិតខេត្ត ជូនអង្គពិធី និងទទួលយកនូវអ្វីដែលថ្មី ព្រមទាំងបញ្ហាប្រឈមនានា ដើម្បីស្វែងរកដំណោះស្រាយ និងរៀបចំផែនការធ្វើបន្ត អភិវឌ្ឍន៍ក្នុងមូលដ្ឋានរបស់យើងឲ្យបានល្អប្រសើរ ។
ឯកឧត្តម ដៀប ពីរី លើកឡើងថា វេទិកានេះ គឺជាយន្តការមួយដើម្បីលើកកម្ពស់គណនេយ្យ តម្លាភាព និងការឆ្លើយតបរបស់ក្រុមប្រឹក្សាខេត្ត ជាមួយនឹងប្រជាពលរដ្ឋ ដើម្បីធានាថា រាល់បញ្ហាអាទិភាពរបស់ប្រជាពលរដ្ឋក្នុងមូលដ្ឋានត្រូវបានពិនិត្យ និងដោះស្រាយនិងឆ្លើយតប (បានឬមិនបាន) ហើយគ្រប់អ្នកពាក់ព័ន្ធទាំងអស់ក្នុងមូលដ្ឋាន ត្រូវបានចូលរួមក្នុងអង្គពិធីនេះផងដែរ។
ឯកឧត្តមបញ្ជាក់បន្ថែមទៀតថា នៅក្នុងវេទិកាព្រឹកនេះ យើទទួលបានសំនួរ និងសំណូមពរ សរុបចំនួន ៣៩ ក្នុងនោះយើងបានដោះស្រាយឆ្លើយតបភ្លាមៗបានមួយចំនួន ចំពោះសំនួរដែលនៅសល់ យើងនឹងយកមកលើកក្នុងអង្គប្រជុំក្រុមប្រឹក្សាខេត្ត ដើម្បីដោះស្រាយបញ្ហានេះបន្តទៀត។